कोण आहे अजित तिवडे.?

ना पद, ना पक्ष, ना राजकीय वारसा.. तरीही जनतेचा प्रचंड विश्वास.!
सत्ताधाऱ्यांना धडकी, राजकीय गणित कोलमडण्याच्या मार्गावर.!

कोल्हापूर | प्रतिनिधी 

आजच्या राजकारणात पद, पक्ष आणि सत्तेची गणिते केंद्रस्थानी असताना गेल्या चार वर्षांपासून एक सामान्य व्यक्ती

कोणत्याही राजकीय पक्षाचा आधार नसताना केवळ कामाच्या जोरावर जनतेच्या मनात स्थान निर्माण करत आहे. अजितदादा भगवान तिवडे हे नाव आज कोल्हापूरमधील तरुण, वयोवृद्ध, महिला आणि गरजू घटकांमध्ये आशेचे प्रतीक बनले आहे.

ना कोणते पद, ना पक्षाची साथ, ना राजकीय पार्श्वभूमी. तरीही समाजासाठी झटणारा हा माणूस दिवसभर आपली कामे करून समाजोपयोगी कामे करताना दिसतो. रस्त्यांवरील खड्डे बुजवणे, आरोग्य व रक्तदान शिबिरे आयोजित करणे, तरुणांना व्यसनमुक्तीच्या मार्गावर आणण्यासाठी समजावणे, महिलांच्या सुरक्षिततेसाठी ठाम व कठोर भूमिका घेणे- ही कामे त्यांनी कोणत्याही प्रसिद्धीच्या अपेक्षेविना केली.

कर्जबाजारीपणामुळे आयुष्याला कंटाळलेल्या अनेक तरुणांना त्यांनी केवळ आर्थिक मदतच केली नाही, तर त्यांना नवीन व्यवसाय उभा करण्यासाठी मार्गदर्शन करून आत्मविश्वास दिला. त्यामुळेच आज अनेक कुटुंबे पुन्हा उभी राहिली आहेत.

सत्तेच्या राजकारणाला छेद देणारा निर्णय

आज जिथे पक्षांतर, तिकीट न मिळाल्याची नाराजी आणि सत्तासंघर्ष सुरू आहे, तिथे अजित तिवडे यांनी कोणताही राग-रोष न धरता अपक्ष निवडणूक लढवण्याचा ठाम निर्णय घेतला आहे. “निवडणूक ही पक्षाच्या तिकिटावर नाही, तर केलेल्या कामाच्या पोचपावतीवर जिंकली पाहिजे,” असा ठाम विश्वास त्यांनी व्यक्त केला आहे.

पुढील पाच वर्षांचा ठोस आराखडा

रुईकर कॉलनी परिसरात वास्तव्यास असल्याने तेथील नागरिकांच्या अडचणींचा सखोल अभ्यास करून गेल्या दोन वर्षांपासून त्यांनी अनेक ठिकाणी विद्युत खांबांची व्यवस्था करून दिली. वनसंवर्धन दिनानिमित्त वृक्षारोपण, अतिवृष्टी व आपत्तीग्रस्त भागात तातडीने मदत पोहोचवणे अशी कामे सातत्याने त्यांच्या माध्यमातून सुरू आहेत.

म्हणूनच जनतेचा घोळका

राजकीय घोषणांपेक्षा प्रत्यक्ष कामावर विश्वास ठेवणारा हा नेता आज कोल्हापूरच्या जनतेसाठी नवा पर्याय ठरत आहे. म्हणूनच “कोण आहे अजित तिवडे?” या प्रश्नाचे उत्तर आज एकच आहे-
तो जनतेतून उभा राहिलेला, जनतेसाठी झटणारा नेता आहे.

महायुती व महाविकास आघाडीच्या नेतृत्वामुळे कोल्हापूर शहराची अधोगती: श्री. राजू माने

कोल्हापूर | प्रतिनिधी

गेल्या वीस वर्षांपासून कोल्हापूर शहराच्या विकासाबाबत सत्तेत व विरोधात असलेले महायुतीचे श्री. धनंजय महाडीक आणि महाविकास आघाडीचे श्री. सतेज पाटील हे युवा नेते महापालिका निवडणुकीपुरते एकमेकांविरोधात शड्डू ठोकतात; मात्र निकाल लागल्यानंतर शहराचा कारभार मोजक्याच नगरसेवकांच्या हाती सोपवला जातो. अशा परिस्थितीत शहराचा सर्वांगीण विकास कसा होणार, असा सवाल एस-फोर ए विकास आघाडीचे नेते श्री. राजू माने यांनी पत्रकार परिषदेत उपस्थित केला.

नगरसेवकांचे प्रमुख कर्तव्य नागरिकांचे मूलभूत प्रश्न सोडवणे हे असताना, या तथाकथित युवा नेत्यांनी आजवर शहराच्या विकासासाठी नेमकी कोणती ठोस कामगिरी केली, यावर नागरिकांनी गांभीर्याने विचार करण्याची गरज असल्याचे माने म्हणाले. शहर हे उद्योग व रोजगारनिर्मितीचे केंद्र असते; मात्र कोल्हापूरमध्ये नवीन उद्योग किंवा रोजगार निर्मितीसाठी या नेत्यांनी कोणते प्रयत्न केले, यावर कोणतीही ठोस चर्चा होत नाही, अशी टीकाही त्यांनी केली.

निवडणुकीत नागरिकांची दिशाभूल करून विजय मिळवणे हाच त्यांचा खरा ‘उद्योग’ बनला असून, दुर्दैवाने आजचा युवा वर्गही या सिस्टीमच्या आहारी गेलेला आहे. या परिस्थितीतून युवक कधी बाहेर पडणार, असा प्रश्न उपस्थित करत प्रत्येक नागरिकाने या नेत्यांना विकासाबाबत जाब विचारला पाहिजे, असे आवाहन माने यांनी केले.

याच पार्श्वभूमीवर कोल्हापूर शहराच्या विकासासाठी तिसऱ्या आघाडीचा पर्याय म्हणून एस-फोर ए विकास आघाडी समोर येत असल्याचे त्यांनी जाहीर केले. ही आघाडी केवळ विकासाच्या मुद्द्यावर नागरिकांसमोर आली असून, खालील प्रमुख मुद्द्यांवर काम करण्याची भूमिका स्पष्ट करण्यात आली आहे.

प्रमुख विकास मुद्दे :

1.    मुंबई, पुणे, नाशिक, नागपूर, सोलापूर यांसारख्या शहरांची अनेक वेळा हद्दवाढ झाली असताना कोल्हापूरची हद्दवाढ का झाली नाही, यावर प्रश्नचिन्ह उपस्थित करत कोल्हापूर महानगर प्रदेश विकास प्राधिकरण (KMRDA) स्थापन करण्याचा ठराव पहिल्याच महासभेत मांडण्याची भूमिका.

2.    पुढील ८ ते १० वर्षांत हद्दवाढ होणे अशक्य असल्याचे वास्तव नागरिकांसमोर मांडून, कोल्हापूर मेट्रोसिटी विकासासाठी ठोस आराखडा.

3.    म्हाडा व सिडकोच्या माध्यमातून सामान्य नागरिकांसाठी परवडणारी घरे तसेच ३० मीटर रुंदीचे रस्ते व डी.पी. प्लॅनमधील रस्त्यांची अंमलबजावणी.

4.    छत्रपती शाहू मिल परिसरात सांस्कृतिक वारसा विकास प्रकल्प राबविणे व शहरालगतच्या ५ किमी परिसरात महापालिकेच्या मूलभूत सुविधा उपलब्ध करून देणे.

5.    टी.पी. स्कीम १ ते ५ तसेच उर्वरित क्षेत्रातील प्रक्रिया पूर्ण करण्यासाठी शासनस्तरावर पाठपुरावा.

6.    शहरातील प्रमुख प्रवेशद्वारांवर कोल्हापूरच्या संस्कृतीचे प्रतीक असलेल्या भव्य स्वागत कमानी व ऐतिहासिक चौकांचे सुशोभीकरण.

सर्व जाती-धर्मांसाठी स्वतंत्र स्मशानभूमी उपलब्ध करून देण्यासाठी शासनाकडून किमान १०० एकर जागेची मागणी.

राष्ट्रसंत तुकडोजी महाराज नागपूर विद्यापीठ आणि महाराष्ट्र चेंबर ऑफ कॉमर्समध्ये सामंजस्य करार;

ग्रामीण भागातील विद्यार्थ्यांमधून घडणार उद्योजक

मुंबई: ग्रामीण भागातील विद्यार्थ्यांमध्ये उद्योजकीय कौशल्यांचा विकास करून त्यांना स्वावलंबी बनवण्याच्या उद्देशाने राष्ट्रसंत तुकडोजी महाराज नागपूर विद्यापीठाच्या व्यवसाय व्यवस्थापन विभाग आणि महाराष्ट्र चेंबर ऑफ कॉमर्स, इंडस्ट्री ॲण्ड ॲग्रिकल्चर (MACCIA) यांच्यात शनिवारी, ३ जानेवारी २०२६ रोजी महत्वपूर्ण सामंजस्य करार (MoU) करण्यात आला. विद्यापीठाच्या सभा कक्षात हा करार हस्तांतरण कार्यक्रम पार पडला.

शैक्षणिक व औद्योगिक क्षेत्राची भक्कम युती

शिक्षण आणि उद्योग क्षेत्रातील दरी कमी करणे, हा या सामंजस्य कराराचा मुख्य उद्देश आहे. या कराराच्या माध्यमातून कौशल्य विकास, नवोपक्रम (Innovation), शिक्षक क्षमता वृद्धी, विद्यार्थ्यांसाठी इंटर्नशिप तसेच उद्योगांमधील प्रत्यक्ष समस्यांवर उपाय शोधण्यासाठी दोन्ही संस्था एकत्रितपणे काम करणार आहेत.

‘गाव तिथे उद्योजक’ संकल्पनेला चालना

यावेळी महाराष्ट्र चेंबर ऑफ कॉमर्स, इंडस्ट्री ॲण्ड ॲग्रिकल्चरचे अध्यक्ष रविंद्र माणगावे यांनी चेंबरची स्थापना, कार्यपद्धती व आगामी उपक्रमांची माहिती दिली. प्रत्येक गावात उद्योजक निर्माण व्हावेत या उद्देशाने ‘गाव तिथे उद्योजक’ आणि ‘उद्योग विचार मंच’ यांसारखे उपक्रम राबवले जात असल्याचे त्यांनी सांगितले. ग्रामीण भागातील युवकांना उद्योग सुरू करण्यासाठी आवश्यक प्रशिक्षण, मार्गदर्शन व भांडवल उपलब्ध करून देण्यावर चेंबरचा भर आहे. तसेच जागतिक स्तरावर व्यापार व उद्योगांना बाजारपेठ उपलब्ध व्हावी यासाठी महाराष्ट्र चेंबरने ६० देशांशी सामंजस्य करार केले असल्याची माहिती त्यांनी दिली.

ग्रामीण महाविद्यालयांवर विशेष लक्ष- कुलगुरू

विद्यापीठाच्या कुलगुरू डॉ. मनाली क्षीरसागर यांनी या कराराचे स्वागत करताना सांगितले की, “हा करार ग्रामीण भागातील विद्यार्थ्यांसाठी दिशादर्शक ठरणार आहे. प्रत्येक तालुक्यात एका महाविद्यालयाला ‘हब’ म्हणून विकसित करून त्या माध्यमातून परिसरातील इतर महाविद्यालयांतील विद्यार्थ्यांना उद्योजकतेचे प्रशिक्षण दिले जाईल.”
या उपक्रमामुळे नागपूर विद्यापीठाशी संलग्न असलेल्या ग्रामीण भागातील तरुणांना नोकरीच्या शोधात न राहता स्वतःचा उद्योग सुरू करण्याची संधी उपलब्ध होणार आहे, असेही त्यांनी नमूद केले.

मान्यवरांची उपस्थिती

या कार्यक्रमास महाराष्ट्र चेंबर ऑफ कॉमर्स, इंडस्ट्री ॲण्ड ॲग्रिकल्चरचे अध्यक्ष रविंद्र माणगावे, कार्यकारिणी सदस्य सी. पी. ठक्कर, महासचिव सुरेश घोरपडे, सदस्य राजन ठवकर, कुलगुरू डॉ. मनाली क्षीरसागर, कुलसचिव डॉ. राजू हिवसे, वाणिज्य व व्यवस्थापन विद्याशाखेच्या अधिष्ठाता डॉ. मेधा कानेटकर, व्यवसाय व्यवस्थापन विभाग प्रमुख डॉ. राहुल खराबे तसेच रोजगार व प्रशिक्षण अधिकारी डॉ. भूषण महाजन उपस्थित होते.

Contact For News, Advertising& Promotions:

www.kolhapurnews24hrs.in

kolhapurnews26@gmail.com

 

लहूजी वस्ताद साळवे जयंती आणि मातंग जागृती परिषद- एक प्रेरणादायी सामाजिक प्रवास

कोल्हापूर: १४ नोव्हेंबर २०२५ हा दिवस पेठवडगाव (ता. हातकणंगले) येथे सामाजिक जागृतीचा आणि प्रेरणेचा अनोखा संगम घेऊन आला. गुरुप्रसाद सांस्कृतिक भवन येथे सत्यशोधक क्रांतीगुरू लहूजी वस्ताद साळवे प्रतिष्ठान, महाराष्ट्र राज्य यांच्या वतीने २३१ वी जयंती निमित्त मातंग जागृती परिषद भव्यदिव्य पार पडली. मातंग समाजातील आदर्श सामाजिक कार्यकर्त्यांचा सन्मान, समाजाच्या प्रगतीवरील विचारमंथन आणि पुढील वाटचालीसाठीची दिशा या सर्वांचे अत्यंत सुंदर मिश्रण या कार्यक्रमात पाहायला मिळाले.

परिषदेमागचे प्रेरणास्थान- लहूजी वस्ताद साळवे हे फक्त योद्धे नव्हते तर सामाजिक क्रांतीचे दीपस्तंभ होते. अत्याचाराविरोधात लढण्याची ताकद, संघटनक्षमता आणि आत्मसन्मान हा त्यांचा वारसा आजच्या पिढीसाठी मार्गदर्शक आहे. त्यांच्या जयंतीदिनी मातंग जागृती परिषद ही केवळ साजरी करण्याची औपचारिकता नव्हती; ती समाजाला विचार करायला भाग पाडणारी मोठी चळवळ होती.

समाजासाठी निस्वार्थपणे काम करणाऱ्या मातंग समाजातील अनेक कार्यकर्त्यांचा या सोहळ्यात सन्मान करण्यात आला. समाजात परिवर्तन हे एका क्षणात होत नाही. ते अशा कार्यकर्त्यांच्या सातत्यपूर्ण प्रयत्नांनी घडत असते. त्यांच्या कार्याचा गौरव करून या परिषदेनं नव्या पिढीसमोर प्रेरणादायी आदर्श उभा केला.

प्रमुख पाहुणे-  मा. श्री. अजितदादा भगवान तिवडे यांचे विचारमंथन

या परिषदेत अजित तिवडे फौन्डेशनचे संस्थापक मा. श्री. अजितदादा भगवान तिवडे प्रमुख पाहुणे म्हणून उपस्थित होते. त्यांच्या मनोगतात समाजाच्या उन्नतीसाठी आवश्यक असणाऱ्या काही मुद्द्यांवर त्यांनी स्पष्ट व ठामपणे प्रकाश टाकला.

आजच्या पिढीने लहूजी वस्ताद साळवे यांसारख्या महापुरुषांचे विचार, त्यांचे कार्य आणि त्यांच्या धैर्यपूर्ण जीवनातून योग्य प्रेरणा घ्यायला हवी. समाजातील समस्या कितीही गुंतागुंतीच्या असल्या तरी योग्य नेतृत्व आणि संघटित शक्तीमुळे त्यांचे निराकरण अधिक परिणामकारकपणे करता येते. समाजाला सक्षम करण्यासाठी शिक्षण, सामाजिक नेतृत्व आणि सामाजिक प्रश्नांविषयी जागरूकता या तीन गोष्टी अपरिहार्य असल्याचे त्यांनी नमूद केले.

अजितदादांनी प्रमुख पाहुणे म्हणून निमंत्रण दिल्याबद्दल मनःपूर्वक आभार मानताना म्हटले:
“समाजाच्या प्रगतीसाठी अशा परिषदांची गरज आहे. मला या प्रेरणादायी सोहळ्यास उपस्थित राहण्याची संधी दिल्याबद्दल मी आपल्या सर्वांचा आभारी आहे.”

कार्यक्रमात प्रतिष्ठानचे पदाधिकारी, मातंग समाजातील मान्यवर, विविध क्षेत्रातील सामाजिक कार्यकर्ते आणि उत्स्फूर्त नागरिक मोठ्या प्रमाणात उपस्थित होते. सभागृहातील वातावरणात उत्साह, ऐक्य, प्रगतीची तळमळ आणि आत्मसन्मानाची भावना भरलेली होती. मातंग जागृती परिषद ही फक्त एक सांस्कृतिक कार्यक्रम नव्हे, तर समाजाच्या भवितव्याचा मार्ग दाखवणारा दीपस्तंभ ठरली. लहूजी वस्ताद साळवे यांच्या विचारांचा वारसा जपताना समाज एकत्र आला, कार्यकर्त्यांचा गौरव झाला, आणि पुढील पिढीसाठी प्रेरणादायी संदेश देत हा सोहळा यशस्वीरित्या पार पडला.

विश्वासाचा गैरफायदा.! शिंदे कुटुंबाच्या ९२ लाखांवर डल्ला: आजरा तालुक्यातील एकावर गुन्हा दाखल.

ईश्‍वरपूर: ईश्‍वरपूर येथील मंत्री कॉलनी परिसरात राहणाऱ्या एका कुटुंबाचा विश्‍वास संपादन करत, त्यांनी बँक आणि पतसंस्थेत ठेव पावती करण्यासाठी वेळोवेळी दिलेल्या ९२ लाखांच्या रकमेवर आजरा तालुक्यातील ठकसेनाने डल्ला मारल्याची घटना उघडकीस आली. हा प्रकार २०२० ते मार्च २०२५ या कालावधीत घडला आहे. याबाबत डॉ. राणोजी अशोकऱाव शिंदे (वय ५०) यांनी पोलिसात फिर्याद दिली आहे.

त्यानुसार, सचिन विष्णू पाटकर (रा. वझरे, ता. आजरा, जि. कोल्हापूर) याच्याविरुद्ध भारतीय न्यायसंहितेच्या विविध कलमांखाली फसवणूक, विश्‍वासघात, ठकबाजीचा गुन्हा नोंद करण्यात आला आहे. सचिन पाटकर यांनी डॉ. राणोजी शिंदे यांच्यासह त्यांच्या कुटुंबातील आई, वडील व इतर सदस्यांचा विश्‍वास संपादन केला होता. त्यामुळे कुटुंबातील सर्वजण त्याच्याकरवी बँक आणि पतसंस्थेमधील आर्थिक व्यवहार करत होते.

त्यांच्या या विश्‍वासाचा गैरफायदा घेत, पाटकर यांनी ५ वर्षांच्या कालात तब्बल ९२ लाख १९ हजार ७६६ रुपये इतकी रक्कम त्यांना परत न करता स्वतःच्या फायद्यासाठी वापरली. पोलीस उपनिरीक्षक सतीश मिसाळ अधिक तपास करीत आहेत.

बनावट सह्या करून रक्कम उकळली

पाटकर याने या शिंदे कुटुंबाच्या परस्पर बँकेत जाऊन शिंदे यांच्या आई-वडिलांच्या नावाने असलेल्या ठेवांची मुदत पूर्ण झाल्यावर तर काही पावत्यांची मुदत संपण्यापूर्वी रक्कम मिळण्यासाठी दोघांच्या नावाने पैसे काढण्याच्या स्लिपवर बनावट सह्या करून ही रक्कम उकळली आहे, तसेच त्याने बँकेत रक्कम जमा केली आहे, हे भासविण्यासाठी बँकेच्या नावाने हुबेहूब दिसणाऱ्या बनावट पावत्या तयार करून त्या खऱ्या आहेत असे सांगत, या कुटुंबांची फसवणूक केली.

कुठे आघाडी तर कुठे बिघाडी; जिल्ह्यातील नगरपालिका निवडणुकीत नव्या समीकरणांची मांडणी

जिल्ह्यात नगरपालिका व नगरपंचायत निवडणुकीची रणधुमाळी सुरू होताच राजकीय पक्षांमधील जुनी वैमनस्ये, कटुता आणि आरोप-प्रत्यारोप बाजूला सारून आता नवे 'मैत्री समीकरण' उभे राहताना दिसत आहे.

• कुठे आघाडी तर कुठे बिघाडी
• जिल्ह्यातील नगरपालिका निवडणुकीत नव्या समीकरणांची मांडणी
• निवडणूकीच्या पार्श्वभूमीवर अंतर्गत वाद

कोल्हापूर: जिल्ह्यात नगरपालिका व नगरपंचायत निवडणुकीची रणधुमाळी सुरू होताच राजकीय पक्षांमधील जुनी वैमनस्ये, कटुता आणि आरोप-प्रत्यारोप बाजूला सारून आता नवे ‘मैत्रीचे समीकरण’ उभे राहताना दिसत आहे. विधानसभा आणि लोकसभा निवडणुकीत एकमेकांवर तुटून पडणारे नेतेमंडळी आता मात्र ‘आपण दोघे भाऊ-भाऊ’ अशी भूमिका घेत एकाच ताटात बसून जेवणारे राजकीय सोबती बनले आहेत. ‘तुझे माझे पटेना, पण तुझ्याशिवाय जमेना’ असे वास्तव या निवडणुकीत स्पष्ट दिसू लागले आहे.

महाविकास आघाडीमध्ये ठिकठिकाणीमहाविकास आघाडीमध्ये ठिकठिकाणी दुफळी निर्माण झाल्याने अनेक शहरांत तणावपूर्ण वातावरण निर्माण झाले आहे. काँग्रेस, राष्ट्रवादी व शिवसेना (उद्दव) गटांमध्ये जागावाटपावरून मतभेद तीव्र झाले असून काही ठिकाणी तर अधिकृत आघाडी उमेदवारांपेक्षा बंडखोरांची ताकद जास्त भासू लागली आहे. परिणामी, महाविकास आघाडीच्या ‘संयुक्त लढाई’च्या घोषणा कागदोपत्री राहून प्रत्यक्ष मैदानात प्रत्येक पक्ष स्वतःचे वर्चस्व सिद्ध करण्यासाठी स्वतंत्र तयारी करताना दिसत आहे.

दरम्यान, सर्वच प्रमुख पक्षांमध्ये बंडखोरीचा सुर अधिक तीव्र झाला आहे.शिवसेना शिंदे गट, भाजप, राष्ट्रवादी (शरद पवार) आणि काँग्रेस या चारही पक्षांत अधिकृत उमेदवारी न मिळाल्याने नाराज नेते स्वतःची ताकद दाखवण्यासाठी स्वतंत्र पथक उभे करत आहेत. निवडणूकप्रचाराच्या पहिल्याच टप्प्यात ‘स्वतंत्र सुभा’ देणाऱ्या उमेदवारांची संख्या वाढत असून त्यामुळे अनेक ठिकाणी चुरस अधिक रंगतदार झाली आहे.सत्ता मिळवण्यासाठी राजकीय पक्षांची जुळवाजुळव सुरू असून जनतेच्या मनात यामुळे प्रश्न निर्माण झाला आहे. आदर्श, भूमिका आणि विचार किती? आणि सत्ता मिळवण्यासाठी केलेली युत्ती किती?कारण गेल्या काही महिन्यांपूर्वीच टीका-टिप्पणी करणारे नेते आज मात्र एकोप्याच्या नावाखाली ‘भाऊगर्दी’ करताना दिसत आहेत.

शरद पवारांच्या राष्ट्रवादीला धक्का: शेकडो कार्यकर्त्यांचा भाजपा मध्ये प्रवेश

‘गोपनीय आघाड्या’ चा अनोखा पॅटर्न अस्तित्वात

विशेषत: ग्रामीण भागातील नगरपंचायत निवडणुकीत स्थानिक गट-तट, निष्ठावंताची लढाई आणि वैयक्तिक वर्चस्वाचा संघर्ष अधिक पाहायला मिळत आहे. काही प्रभागांमध्ये कालपर्यंत एकमेकांविरुद्ध आरोप करणारे नेते आज हातात हात घालून एकजुटीचा दावा करत आहेत. तर काही ठिकाणी राजकीय मित्रांपेक्षा प्रतिस्पध्र्थ्यांसोबत करार करून ‘गोपनीय आघाड्या’ उभ्या केल्या जात आहेत.

कोल्हापूर जिल्ह्यात सत्ता मिळवण्यासाठी कितीही अंतर्गत वाद असले तरी प्रत्येक पक्षाला शेवटी एकमेकांशिवाय चालत नाही. तुझे माझे पटत नाही, पण तुझ्याशिवाय जमणारही नाही, अशीच स्थिती या निवडणुकीत दिसत आहे. प्रचाराची उर्मी वाढत असताना गटबाजी, तडजोडी, बंडखोरी आणि अचानक बदललेली भूमिका या सर्व घडामोडींमुळे कोल्हापूरची स्थानिक निवडणूक आता पूर्वर्वीपेक्षा अधिक रंगतदार झाली असून पुढील काही दिवसात आणखी नाट्यमय राजकीय घडामोडी होण्याची शक्यता आहे.

कागल नगरपालिकेसाठी एकमेकांचे कट्टर विरोधक असलेले हसन मुश्रीफ व समजीतसिंह घाटगे या निवडणुकीत एकत्र आले आहेत. तर गडहिंग्लजमध्ये जनता दलाने मुश्रीफांच्या विरोधात भाजप, जनसुराज्य शक्ती शिवसेना शिंदे एकत्र आले आहेत. कुरुंदवाड नगरपालिकेत नव्या आघाडीचा उदय झाला आहे. पेठ वडगाव मध्ये पारंपारिक यादव आघाडी विरुद्ध युवक क्रांती आघाडी जनसुराज्य शक्ती व ताराराणीनी मोट बांदली आहे. पन्हाळ्यामध्ये जनसुराज्यला रोखण्यासाठी भाजपची आघाडी सुरू आहे. चंदगडमध्ये दोन्ही राष्ट्रवादी एकमेकांचे विरोधात आहेत. शिरोळमध्ये राजषी शाहू विकास आघाडी, शिवशाही विकास आघाडी. ताराराणी आघाडी अशी समीकरणे झाली आहेत.

Contact For News, Advertising& Promotions:

www.kolhapurnews24hrs.in

kolhapurnews26@gmail.com

मतदार यादीतील घोळ हा केवळ विरोधासाठी विरोध - मंत्री चंद्रकांत पाटील; हाळवणकरांच्या आमदारकीबाबत म्हणाले..

'पुन्हा-पुन्हा निवडणुकीची तयारी करण्यात वेळ आणि पैसा व्यर्थ जातो. त्यामुळे निवडणुका लांबणीवर पडणे परवडणारे नाही'

इचलकरंजी : मतदार यादीतील घोळ हा विरोधकांचा केवळ कांगावा आहे. विरोधासाठी विरोध म्हणून ते आरोप करत आहेत. पुन्हा-पुन्हा निवडणुकीची तयारी करण्यात वेळ आणि पैसा व्यर्थ जातो. त्यामुळे निवडणुका लांबणीवर पडणे परवडणारे नसल्याचे मत उच्च व तंत्रशिक्षणमंत्री चंद्रकांत पाटील यांनी व्यक्त केले.भाजपचे ज्येष्ठ कार्यकर्ते पांडुरंग म्हातुकडे आणि धोंडीराम जावळे यांचे निधन झाल्याने त्यांच्या घरी भेट देण्यासाठी मंत्री पाटील इचलकरंजीत आले होते. त्यानंतर त्यांनी हाळवणकर आणि आवाडे यांच्या निवासस्थानीही भेटी दिल्या.

पत्रकारांशी संवाद साधताना पाटील म्हणाले, महापालिका निवडणुका महायुती म्हणून लढविणार आहोत. राज्यभरात एक युती होणार नाही, ती काही ठिकाणी शहरानुसार व काही ठिकाणी प्रभागानुसार असेल. एखाद्या प्रभागात युती असेल, तर एखाद्या प्रभागात नसेलही. जेणेकरून सत्ता कशी येईल, ते पाहिले जाईल. आरक्षण पडल्याशिवाय युतीविषयी स्पष्ट सांगता येणार नाही.भाजपचे प्रदेश उपाध्यक्ष सुरेश हाळवणकर यांच्या निवासस्थानी झालेल्या भेटीदरम्यान हाळवणकर परिवारासह अजित जाधव, तानाजी पोवार, अशोक स्वामी, अनिल डाळ्या, प्रमोद बचाटे आदी उपस्थित होते.तसेच आवाडे यांच्या निवासस्थानी आमदार राहुल आवाडे, माजी मंत्री प्रकाश आवाडे, आवाडे जनता बॅँकेचे अध्यक्ष स्वप्निल आवाडे, आवाडे परिवार, प्रकाश दत्तवाडे, सुनील पाटील, शेखर शहा, आदींसह प्रमुख पदाधिकारी व कार्यकर्ते उपस्थित होते.हाळवणकर यांची आमदारकी पहाटेच्या शपथविधीसारखीभाजपचे प्रदेश उपाध्यक्ष सुरेश हाळवणकर यांची आमदारकी ही राजकारणातील पहाटेच्या शपथविधीसारखी असेल. राज्यपाल नियुक्तीमधील भाजपच्या कोट्याच्या तीन जागा आहेत किंवा विधानपरिषद यापैकी जे लवकर होईल, त्यामधील पहिल्या यादीत सुरेश हाळवणकर यांचे नाव असेल. याबाबत माझे मुख्यमंत्र्यांशी बोलणे झाले आहे, अशी माहिती मंत्री पाटील यांनी दिली.

बिबट्याचा हल्ला कि घातपात, संभ्रम कायम....

आंबा : बिबट्याच्या हल्ल्यात कंक दाम्पत्याच्या झालेल्या मृत्यूप्रकरणी वन विभाग व पोलिस विभाग यांनी सोमवारी तपास सुरु ठेवला. मात्र या प्रकरणातील गुंता वाढला असून पोलिस व वनखाते एकमेकांकडे बोट करीत असल्याने या प्रकरणाचा उलघडा आव्हान बनले आहे. गोलीवणे वस्तीपासून सहा किलोमीटर दूर निर्जन धरणकाठी झोपडी करून राहिलेल्या निनू यशवंत कंक व पत्नी रखुबाई यांचा जंगली प्राण्यांच्या हल्ल्यात मृत्यू झाल्याची फिर्याद मुलगा सुरेश कंक यांनी शाहूवाडी पोलिसांत दिली. पण, वन विभागाने जंगली प्राण्यांचा हल्ला साफ नाकारला आहे.रविवारी सायंकाळी घटनास्थळाचा पंचनामा झाल्यानंतर दोघांचे मृतदेह रात्री आठला मलकापूर ग्रामीण रुग्णालयात विच्छेदनासाठी आणले. पण, पोलिस यंत्रणेने अचानक कोल्हापूरला मृतदेह इन कॅमेरा विच्छेदनास रवाना केले.

त्यामुळे मृतदेहांसाठी नातेवाइकांना चौवीस तास तिष्ठत बसावे लागले. सोमवारी दुपारी साडेतीनला मृतदेह गोलीवणे वसाहतीमध्ये आणला. विविध गावांत विस्थापित झालेले ग्रामस्थ मोठ्या संख्येने उपस्थित होते. मृतदेह दारात उतरताच कुटुंबीयांसह नातेवाइकांनी एकच टाहो फोडला. साेमवारी घटनास्थळी भेट दिली असता, घटनास्थळाच्या पूर्वेला दहा फुटांवरील महाबळ फार्म हाऊसमधील सीसीटीव्ही कॅमेरे तपासण्यात एल.सी.बी.चे तपास पथक कार्यरत होते. दरम्यान, श्वान पथकही पाचारण करून तपास केला. एल.सी.बी. पथक प्रमुख पी.एस.आय. पाटील यांनी अद्याप फुटेजमध्ये संशयास्पद काही आढळले नसल्याचे सांगितले. पुणे येथील वरिष्ठ कार्यालयातून शवविच्छेदनाचा अहवाल मिळाला की, या प्रकरणाची दिशा स्पष्ट होईल, असे पाटील यांनी स्पष्ट केले. प्रथमदर्शनी रखुबाईंच्या चेहरा व मानेवर खाेलवर जखमा दिसत असल्याचे स्पष्ट केले. मात्र, निनू यांच्या अंगावर जखमा दिसत नसल्याने त्यांच्या मृत्यूबाबत संभ्रम व्यक्त केला.दरम्यान, शाहूवाडीचे पोलिस निरीक्षक व तपास अधिकारी विजय घेरडे यांनी घटनास्थळी भेट दिली. त्यांनीही रखुबाईंवर प्राण्याने हल्ला केला असावा, असा प्राथमिक अंदाज व्यक्त केला. शवविच्छेदनाच्या अहवालावर तपासाची दिशा ठरेल, असा दुजोराही त्यांनी दिला. 

वन विभाग व पोलिसांचे परस्परविरोधी मतबिबट्याने हल्ला केल्याचे वन विभाग स्पष्ट नाकारत आहे. रखुबाईंच्या केसांचा एकत्रित पडलेला पुंजका, एक डावा हात व उजवा पाय, असे परस्परविरोधी अवयव प्राणी ठरवून तोडतो का ? शिवाय पती निनूचा मृतदेह झोपडीपासून साठ मीटरवरील जलाशयात कसा परफडत नेला ? तसे असेल तर जखम कशी नाही, हे संशयास्पद चित्र असल्याचे म्हणणे वनाधिकाऱ्यांचे आहे. याउलट पोलिस अधिकारी मात्र प्राण्यांचा हल्ला असल्याचे सांगत आहेत. दोन्ही विभाग परस्परविरोधी भूमिका मांडत असल्याने या मृत्यू प्रकरणाचा गुंता वाढला आहे.प्रकल्पग्रस्त वसाहतीवर स्मशान शांतता...प्रत्येक सणाला आई-वडील घराला पाय लावून जायचे. दिवाळीला घरी या म्हणून सुरेश सांगून आला होता. पण, ऐन दिवाळीत आई-वडीलांचा मृतदेह पाहण्याची वेळ कंक कुटुंबीयांवर आली. 

संभम्र निर्माण करणारे काही प्रश्न..

• गोळीवणे येथील घटना जंगली प्राण्यांच्या हल्ल्यात झाली नसावी, असा प्राथमिक अंदाज वन विभागाने वर्तविला आहे.
• या परिसरात जंगली प्राण्यांच्या पाऊलखुणा किंवा अस्तित्वाचे पुरावे मिळालेले नाहीत. 
• दोन्ही व्यक्तींचे मृतदेह ४०० ते ५०० मीटर अंतरात वेगवेगळ्या ठिकाणी सापडले आहेत. 
• प्राण्यांनी हल्ला केल्याचे ठोस पुरावे प्रथमदर्शनी सापडत नसल्याचे वन अधिकाऱ्यांनी स्पष्ट केले आहे. 
• घातपाताची शक्यता पोलिसांनी फेटाळली आहे. त्यामुळे कंक दाम्पत्याचा मृत्यू नेमका कधी झाला? याचे कोडे सुटलेले नाही.
• दोन्ही मृतदेहांमध्ये एवढे अंतर कसे काय? ही घटना निदर्शनास येण्यास एवढा उशीर का झाला? या प्रश्नांची उत्तरे अद्याप मिळालेली नाहीत. त्यामुळे संभ्रमावस्था कायम आहे.
• मृतदेहांचा व्हिसेरा आणि फॉरेन्सिकचा अहवाल आल्यानंतरच या घटनांचा उलगडा होण्याची शक्यता वर्तविली जात आहे.

कारागृहातून पळालेल्या कैद्याचा तपास एलसीबीकडे, गेल्या अडीच महिन्यांपासून पसार

कोल्हापूर : कळंबा कारागृहाच्या सर्व्हिसिंग सेंटरवरून ग्राहकाची कार घेऊन पळालेला जन्मठेपेच्या शिक्षेतील कैदी सुरेश आप्पासो चोथे (वय ३८, रा. चोथेवाडी, ता. गडहिंग्लज) याचा अद्याप पोलिसांना थांगपत्ता लागलेला नाही. गेल्या अडीच महिन्यांपासून तो पसार आहे. तो अजूनही जुना राजवाडा पोलिसांना सापडत नसल्याने पोलिस अधीक्षक योगेश कुमार यांनी शनिवारी (दि. १८) याचा तपास स्थानिक गुन्हे अन्वेषण शाखा म्हणजेच एलसीबीकडे वर्ग केला.अनैतिक संबंधातून गडहिंग्लज तालुक्यातील एका शिक्षकाचा खून केल्याप्रकरणी सुरेश चोथे याला सिंधुदुर्ग न्यायालयाने जन्मठेपेची शिक्षा सुनावली होती. तो ऑगस्ट २०२२ पासून कळंबा कारागृहात शिक्षा भोगत होता. चांगल्या वर्तनामुळे त्याला खुल्या कारागृहातील कामे दिली जात होती.

२४ जुलै २०२५ रोजी कारागृहासमोरील खुल्या जागेत सर्व्हिसिंग सेंटरवर काम करताना तो ग्राहकाची कार घेऊन पळाला होता. त्याने पळवलेली कार दोन दिवसांनी कोकणात वैभववाडी येथील बाजारपेठेत एका हॉटेलसमोर पोलिसांना सापडली होती. त्याचे सीसीटीव्ही फुटेजही जुना राजवाडा पोलिसांच्या हाती लागले होते. त्यानंतर मात्र तपास रखडला. गणेशोत्सव, नवरात्रोत्सव यासह इतर कामांमध्ये पोलिस अडकल्याने तपास होऊ शकला नाही, अशी कारणे पोलिसांकडून सांगितली जात आहेत. पोलिस अधीक्षक योगेश कुमार यांनी जुना राजवाडा पोलिसांकडून आढावा घेऊन पुढील तपास एलसीबीकडे सोपवला.अडीच महिने कैदी मोकाटकैदी चोथे हा ग्राहकाची कार घेऊन थेट कोकणात गेला. वैभववाडी बाजारपेठेत कार सोडून तो पुढे निघून गेला. तो कर्नाटकातील सीमाभागात लपला असावा, असा पोलिसांचा अंदाज आहे. यासाठी त्याला त्याच्या काही मित्रांनी मदत केल्याचा संशय आहे. पोलिसांकडून त्याच्या मित्रांची चौकशी होण्याची गरज व्यक्त केली जात आहे. कळंबा कारागृहातून पसार झालेला कैदी सुरेश चोथे याचा तपास नुकताच एलसीबीकडे आला आहे. त्याची माहिती काढण्याचे काम सुरू आहे. लवकरच त्याच्या मुसक्या आवळू. - रवींद्र कळमकर, पोलिस निरीक्षक, एलसीबी

Contact For News, Advertising& Promotions:

www.kolhapurnews24hrs.in

kolhapurnews26@gmail.com

 राज ठाकरेंनी उद्धव ठाकरेंसाठी ताफा रोखला, नक्की काय घडलं?

        मनसे अध्यक्ष राज ठाकरे यांनी आपल्या भावासाठी आज ताफा रोखला. उद्धव ठाकरे शिवतीर्थ बंगल्यावरुन जात असताना दोन्ही बंधू समोरासमोर आले. दोन्ही ठाकरे भावांचा ताफा तिथून जात होता. यावेळी राज ठाकरे यांनी उद्धव ठाकरे यांचा ताफा जावा यासाठी आपला ताफा रोखायला लावला. राज ठाकरे यांच्या या कृतीची सध्या राजकीय वर्तुळात एकच चर्चा होत आहे. विशेष म्हणजे दोन्ही भाऊ एकाच मार्गाने एकाच वेळी समोरासमोर आलेल्या टायमिंगची देखील चर्चा होत आहे..

        मुंबई: ठाकरे घराण्याचे दोन भाऊ एकत्र येणार का? हा प्रश्न प्रत्येक मराठी माणसाच्या मनात अनेक वर्षांपासून आहे. दोन्ही ठाकरे भावांनी एकत्र यावं, असं बहुसंख्य मराठी नागरिकांना वाटतं. दिवंगत शिवसेनाप्रमुख बाळासाहेब ठाकरे यांचा महाराष्ट्रासह देशात मोठा चाहतावर्ग होता. या चाहतावर्गाला आजच्या घडीला दोन ठाकरे बंधूंनी एकत्र यावं, असं वाटतं. महाराष्ट्राचं राजकारण सध्याच्या घडीला फार टोकाचं आणि विचित्र अवस्थेत गेलं आहे. दोन मोठ्या प्रादेशिक पक्षांमध्ये फूट पडली आहे. अशा या विचित्र परिस्थितीत दोन ठाकरे बंधूंनी एकत्र यावं, असं अनेकांना वाटत आहे. विशेष म्हणजे दोन्ही भाऊ आता एकत्र येण्यासाठी दोघांच्या पक्षात हालचाली सुरु आहेत. आपापसातील वाद, मतभेद बाजूला सारुन दोन्ही भाऊ एकत्र येणार असल्याची चर्चा आहे. राज्य सरकारच्या शालेय शिक्षणात इयत्ता पहिलीपासूनच्या हिंदीसक्तीच्या निर्णयाविरोधात मुंबईत येत्या 5 जुलैला भव्य मोर्चा काढण्यात येणार आहे. या मोर्चात दोन्ही ठाकरे बंधू एकत्र दिसणार आहेत. त्यामुळे महाराष्ट्राचं राजकारण आता वेगळ्या उंचीवर जाऊन पोहचणार असल्याची चर्चा आहे.

        राज्य शासनाच्या हिंदी सक्तीच्या विरोधात शिवसेना उद्धव बाळासाहेब ठाकरे पक्षाचे प्रमुख उद्धव ठाकरे हे आक्रमक झाले आहेत. तसेच मनसे अध्यक्ष राज ठाकरे हे देखील आक्रमक झाले आहेत. दोन्ही बंधूंचे विचार या मुद्द्यावरुन जुळत आहेत. त्यामुळे दोन्ही बंधू 5 जुलैच्या मोर्चात एकत्र दिसणार आहेत. त्याआधी उद्धव ठाकरे यांचा पक्ष आज आझाद मैदानात मराठी शिक्षण केंद्राकडून आयोजित मोर्चात सहभागी झाला. उद्धव ठाकरे स्वत: या आंदोलनात सहभागी झाले. उद्धव ठाकरे यांनी आज आझाद मैदानातीसल आंदोलनात हिंदीसक्तीच्या शासन निर्णयाची होळी केली.

        आझाद मैदानावरील आंदोलन संपल्यानंतर उद्धव ठाकरे हे शिवसेना भवन येथे गेले. ते मनसे अध्यक्ष राज ठाकरे यांचे शिवतीर्थ बंगल्याच्या समोरील रस्त्याने शिवसेना भवन येथे जात होते. यावेळी शिवतीर्थ बंगल्यासमोर अनोखी गोष्ट बघायला मिळाली. उद्धव ठाकरे यांचा ताफा जात असतानाच समोरुन राज ठाकरे यांचादेखील ताफा आला. यावेळी राज ठाकरे यांनी उद्धव ठाकरे यांच्या ताफ्याला जाण्यासाठी आपला ताफा थांबवला. राज ठाकरे यांच्या कृतीची सध्या राजकीय वर्तुळात चांगलीच चर्चा होत आहे.

राज-उद्धव एकत्र येण्याची शक्यता?

        आझाद मैदानावर आज झालेल्या आंदोलनात मनसे नेते नितीन सरदेसाई हे देखील उपस्थित होते. तसेच येत्या 5 जुलैच्या मोर्चात दोन्ही ठाकरे बंधू सहभागी होणार आहेत. या मोर्चात दोन भाऊ एकत्र आले तर मोठं शक्ती प्रदर्शन होणार आहे. यानंतर आगामी मुंबई महापालिकेच्या निवडणुकीत दोन्ही बंधू एकत्र येण्याची शक्यता आहे. दोन्ही ठाकरे एकत्र आले तर मोठी राजकीय ताकद निर्माण होण्याची शक्यता आहे आणि त्याचा फायदा दोन्ही पक्षांना होण्याची शक्यता आहे. त्यामुळे आगामी काळात दोन्ही बंधू एकत्र येतात का? ते पाहणं महत्त्वाचं आहे.

काही जणांना राजकारणासाठी मुद्दा हवा असतो, शक्तिपीठ महामार्गावरून आमदार विनय कोरेंची विरोधकांवर टीका

आगामी स्थानिक स्वराज्य संस्थांच्या निवडणुकीत जनसुराज्य पक्ष ताकदीने उतरणार असून, महायुतीसोबत योग्य मार्ग न मिळाल्यास स्वतंत्र लढण्याची तयारी दर्शवली आहे. आमदार विनय कोरे यांनी विविध विकासकामांवर भाष्य करताना, शेतकऱ्यांच्या हितासाठी सरकार आणि विरोधक यांच्यात चर्चा होणे आवश्यक असल्याचे मत व्यक्त केले. तसेच, UPSC परीक्षेत यश मिळवलेल्या विद्यार्थ्यांचा सत्कार करत त्यांनी राज ठाकरे यांच्या भूमिकेचे समर्थन केले.

कोल्हापूर: आगामी स्थानिक स्वराज्य संस्थांच्या निवडणुकीत जनसुराज्य पक्ष ताकदीने लढणार आहे. त्या पद्धतीने आमची तयारी सुरू झाली आहे. कोल्हापूर महानगरपालिकेत काय करायचं? यासंदर्भात आमच्या चर्चा सुरू आहेतच. मात्र वडगाव, गडहिंग्लज मलकापूर, पन्हाळा, सांगली, सोलापूर यासारख्या अनेक जिल्हा परिषदेच्या जागावर निवडणूक लढण्याच्या चर्चा सुरू आहेत. जिथे आमची ताकद चांगली आहे अशा ठिकाणी आम्ही या निवडणुकीत ताकदीने लढणार आहोत. महायुतीसमोर आम्ही आमची भूमिका मांडणार असून जिथे योग्य मार्ग निघेल तिथे आम्ही महायुतीतून लढू, नाहीतर स्वतंत्र लढू, असे जनसुराज्य पक्षाचे अध्यक्ष आमदार विनय कोरे यांनी म्हटलं आहे. ते आज कोल्हापुरात पत्रकारांशी बोलत होते.

'राज ठाकरे यांची भूमिका अशा पद्धतीने येणं स्वाभाविक'

कोल्हापूरतील वारणानगर इथं UPSC परीक्षेत महाराष्ट्रातून यश संपादीत केलेल्या यशवंताचा सत्कार करण्यात आला. वारणानगरमधील सुराज्य फाउंडेशनच्या वतीने या कार्यक्रमाचे आयोजन करण्यात आलं होतं. वारणा समूहाचे प्रमुख आमदार विनय कोरे यांच्या हस्ते UPSC परीक्षेत यश संपादीत केलेल्या यशवंताचा सत्कार करण्यात आला.

यंदा महाराष्ट्रातून 80 हुन अधिक विद्यार्थ्यांनी UPSC परीक्षेत यश संपदान केले होते. त्यापैकी 20 हुन अधिक विद्यार्थी महाराष्ट्राच्या कानाकोपऱ्यातून आजच्या सत्कार सोहळ्यात उपस्थित होते. यावेळी हिंदी सक्ती विरोधात राज ठाकरे यांनी घेतलेली भूमिका ही नवीन नाही. राजकारणात राजकारणासाठी वेगवेगळे मुद्दे वापरले जातात. राज ठाकरे यांनी मराठी भाषा आणि मराठी पाट्यांसाठी अनेक वर्ष काम केलेलं आहे. मराठी भाषकांना एकत्र आणण्याच त्यांच काम सुरू असताना, हिंदी सक्ती बाबतचा मुद्दा समोर आला आणि यावर राज ठाकरे यांची भूमिका अशा पद्धतीने येणं हे स्वाभाविक आहे, असं आमदार विनय कोरे म्हणाले. राज्यात कोणती भाषा शिकावं अथवा शिकू नये यापेक्षा आपण मराठी भाषिक म्हणून एकत्र असायला हवं, अस मला वाटतं. त्रिभाषा सूत्र यापेक्षा या पूर्वी संपूर्ण राष्ट्र म्हणून एकत्र राहत असताना एक भाषा असावी यासाठी हिंदी फिल्मसृष्टीला मोठ्या प्रमाणात अनुदान देण्याचा प्रयत्न देखील झाला. हे सर्व या आधीपासून चालत आलेल्या गोष्टी आहेत. यामुळे पालक आणि विद्यार्थ्यांवर फार काही परिणाम होतील, असं मला वाटत नाही, असं आमदार कोरे म्हणाले आहेत.

'काही जणांना राजकारणासाठी मुद्दा हवा असतो'

"राज्य सरकारचा महत्त्वाकांक्षी प्रोजेक्ट असलेला शक्तिपीठ महामार्गावरून शेतकरी आणि सरकार आमने-सामने आले आहेत. येत्या 1 जुलैला 12 जिल्ह्यांत महामार्ग रोखत चक्काजाम आंदोलन करण्यात येणार आहे यासंदर्भात देखील बोलताना आमदार विनय कोरे यांनी आपली भूमिका स्पष्ट केली. शक्तीपीठ महामार्ग संदर्भात दोन वेगवेगळ्या भूमिका आहेत. शक्तीपीठ महामार्ग झाला तर त्याचे काय फायदे होऊ शकतात आणि शक्तीपीठ महामार्गात शेतकऱ्यांची जमीन गेली तर काय होणार? शेतकऱ्यांना याची गरज आहे का? अशा वेगवेगळ्या भूमिका आहेत. यासंदर्भात प्रत्यक्ष दोन्ही बाजूने चर्चा होईल", असं आमदार विनय कोरे म्हणाले.
"समृद्धी महामार्ग संदर्भात जेव्हा चांगल अनुदान शेतकऱ्यांना देण्यात आलं त्यावेळी ते सर्व जमिनी देण्यास तयार झाले. रत्नागिरी-नागपूर महामार्गला देखील अतिशय चांगलं अनुदान दिल्याने शेतकरी खुश आहेत. यामध्ये शेतकऱ्यांना अपेक्षेपेक्षा जास्त पैसे मिळाले. शक्तिपीठ महामार्गासाठी काही शेतकरी शेती घ्या म्हणत आहेत. मात्र काही जणांना राजकारणासाठी मुद्दा हवा असतो. जेव्हा प्रत्यक्ष प्रक्रिया सुरू होईल त्यावेळी सरकार आणि विरोधी शेतकरी यांना एकत्र बसवून काही पर्याय निघतो का? हे पहावं लागेल", असेही आमदार विनय कोरे म्हणाले आहेत.

Contact For News, Advertising& Promotions:

www.kolhapurnews24hrs.in

kolhapurnews26@gmail.com

‘वैष्णवी हगवणे प्रकरणात कोणालाही सोडलं जाणार नाही, कडक कारवाई होणार’, एकनाथ शिंदे काय म्हणाले?

 

‘वैष्णवी हगवणे प्रकरणात कोणालाही सोडलं जाणार नाही, कडक कारवाई होणार’, एकनाथ शिंदे काय म्हणाले?

घडलेली घटना अतिशय दुर्दैवी असून, माणुसकीला काळीमा फासणारी आहे, या प्रकरणात कडक कारवाई केली जाईल असं एकनाथ शिंदे यांनी म्हटलं आहे.

पुण्यातून एक दुर्दैवी घटना समोर आली आहे, ती म्हणजे वैष्णवी हगवणे नावाच्या तरुणीने गळफास घेऊन आत्महत्या केली. सासरच्या छळाला कंटाळून तीने आम्हत्या केल्याचा आरोप होत आहे. या प्रकरणानं महाराष्ट्रात खळबळ उडाली आहे. दरम्यान उपमुख्यमंत्री अजित पवार यांच्यानंतर आज आता उपमुख्यमंत्री एकनाथ शिंदे यांनी देखील कस्पटे कुटुंबाची भेट घेतली आहे. घडलेली घटना ही अतिशय दुर्दैवी आणि माणुसकीला काळीमा फासणारी असल्याचं यावेळी उपमुख्यमंत्री एकनाथ शिंदे यांनी म्हटलं आहे.

काय म्हणाले एकनाथ शिंदे? 

घडलेली घटना ही अतिशय दुर्दैवी आणि माणुसकीला काळीमा फासणारी  आहे. पैसे मागत होते, मारहाण करत होते, या सगळ्या घटना घडत होत्या. लोकांची मानसिकता बदलायला हवी, सून म्हणजे मुलगीच असते. अतिशय दुर्दैवी फोटो आहेत. वैष्णवीच्या आई वडिलांची मानसिकता खालावली आहे.

समाज प्रगत झाला आहे, राज्यात अशा घटना घडणे वाईट आहे. अमानवी घटना आहे.  नऊ महिन्याचं बाळ समोर असातना मुलगी असं करू शकत नाही. या सर्व प्रकरणावर मुख्यमंत्री लक्ष ठेवून आहेत, पोलीस काम करत आहेत. घटनेला जबाबदार असणाऱ्या कोणालाही पाठीशी घालू नये. कुटुंबाची भावना लक्षात घेऊन राज्य सरकार कडक कारवाई करेल, अशा कोणत्याही घटनात राजकारण होता कामा नये, परिस्थिती बदलायला हवी, अशा घटना घडू नये म्हणून कारवाई अपेक्षित आहे, कठोर कारवाई केली जाईल, मुख्यमंत्री लक्ष ठेवून आहेत, उच्चस्तरीय चौकशी सुरू आहे, यामध्ये कोणीही असेल त्याला गृहविभाग सोडणार नाही, कोणालाही पाठिशी घातलं जाणार नाही, असं यावेळी एकनाथ शिंदे यांनी म्हटलं आहे.

दरम्यान या प्रकरणात पोलिसांनी आज मोठी कारवाई केली आहे, वैष्णवीचं स्त्रीधन जप्त करण्यात आलं आहे, तसेच तिचा पती आणि तिचा दीर यांच्याकडे असलेलं परवानाधारक पिस्तूल देखील जप्त करण्यात आलं आहे, तसेच तिच्या सासऱ्यानं पळून जाण्यासाठी जी कार वापरली होती ती देखील जप्त करण्यात आली आहे. या प्रकरणात आज वैष्णीचे दोन्ही भाऊ आणि तिच्या एका मैत्रिणीचा जबाब नोंदवण्यात आला आहे.

वैष्णवीकडून 2 वर्षांपूर्वीच आत्महत्येचा प्रयत्न, कीटकनाशक पिऊन… मोठा पुरावा पोलिसांच्या हाती

पुण्यातील वैष्णवी हगवणे हिच्या संशयास्पद मृत्यू प्रकरणात नव-नवी माहिती पोलिसांच्या तपासातून उघड होत आहे. अशातच वैष्णवीने दोन वर्षापूर्वीच आत्महत्येचा प्रयत्न केला असल्याची धक्कादायक माहिती समोर आली आहे. २७ नोव्हेंबर २०२३ रोजीच वैष्णवीने आत्महत्येचा प्रयत्न केला होता. पोलिसांना एका खासगी रूग्णालयाकडून वैष्णवी हगवणेच्या उपचारांची कागदपत्र मिळाली आहेत. यापूर्वी वैष्णवीने विषारी कीटकनाशक प्राशन करून आत्महत्येचा प्रयत्न केला असल्याची माहिती समोर आली आहे. दरम्यान, वैष्णीच्या घरच्यांकडून लग्नात देण्यात आलेलं तब्बल ५१ तोळं सोनं बँकेकडे गहाण ठेवण्यात आलं असल्याची माहिती मिळतेय. या प्रकरणी पुण्याच्या बावधान पोलिसांकडून वैष्णवीचा पती, सासरा, आणि सासूची चौकशी सुरू  आहे.

Contact For News, Advertising& Promotions:

www.kolhapurnews24hrs.in

kolhapurnews26@gmail.com