१०० कोटींची काम केली असती तर रवळनाथाच्या नावावर जोगवा मागायची वेळ आली नसती.

१०० कोटींची काम केली असती तर रवळनाथाच्या नावावर जोगवा मागायची वेळ आली नसती: संभाजी पाटील

आजरा: विकासाच्या नावावर विद्यमान आमदार प्रकाशराव आबिटकर साहेबांनी फक्त स्वतःची घरे भरण्याचे काम केले आहे. आजऱ्यामध्ये कोणत्याही कॉलनी मध्ये गेलात तर पावसाळ्यामध्ये एखादी बाई घराच्या बाहेर पडू शकत नाही, रुग्णांना घरातून दवाखान्यात घेऊन जायचे झालेच तर त्यांना खांद्यावरून किंवा हातातून उचलून घेऊन जावे लागते त्याचप्रमाणे कोणत्याही कॉलनी मध्ये अडचणीच्या वेळी गाडी घेऊन जावू शकत नाही इतकी वाईट परिस्थिती आजऱ्यामध्ये झालेली आहे मग १०० कोटी गेले कुठे..?

मा. प्रकाशराव आबिटकर यांनी आजऱ्याच्या विकासकामासाठी कोणत्याही नगरसेवकाला निधी मंजूर करून दिला नाही. विद्यमान आमदार या निवडणुकीमध्ये हिंदुहृदयसम्राट बाळासाहेब ठाकरे साहेबांच्या नावावर मत मागताना दिसत आहेत मग गेल्या १० वर्षांमध्ये मा. प्रकाशराव आबिटकर यांनी त्यांच्या कोणत्याही भाषणामध्ये बाळासाहेबांच्या नावाचा उल्लेख का केला नाही.? मग फक्त स्वतःच्या स्वार्थासाठी बाळासाहेबांच्या नावाचा वापर करण्याचा अधिकार तुम्हाला कोणी दिला..? अशा प्रश्नांचा भडीमार शिवसेना उपजिल्हाप्रमुख संभाजी पाटील यांनी केला.

निधी मंजूर करायचा, जवळच्या कंत्राटदारांना कामे द्यायची, आपल्या हिशोबाने कामे करून घ्यायची व स्वतःची घरे भरायची हीच कामे  विद्यमान आमदार साहेबांनी गेल्या १० वर्षांमध्ये केली आहेत. स्वतःची महाविद्यालये, क्रेशर्स व स्वतःसाठी जमिनी खरेदी केल्या. गेल्या निवडणुकीमध्ये १८००० मताधिक्याने निवडून आले, फक्त आजऱ्यातूनच मतदारांनी विश्वास ठेवून यांना १४००० मते दिली. पण त्यांनी त्या मतांची माती केली. आबिटकर बंधूंनी आमच्याच लोकांमध्ये गैरसमज निर्माण करून फुट पाडण्याचा प्रयत्न केला आहे. आजऱ्याची जनता यावेळी कोणाच्याही भूलथापांना बळी पडणार नाही व कमीत कमी ६००० मताधिक्क्याने के पी पाटील साहेबांना निवडून देणार असल्याची ग्वाही शिवसेना उपजिल्हाप्रमुख संभाजी पाटील यांनी दिली.

शेतकऱ्यांच्या आत्महत्यांच्या पापाचे धनी शिंदे, फडणवीस व अजित पवार; सतेज पाटलांचा जोरदार हल्लाबोल

पाटील यांनी कोल्हापूर सांगली साताऱ्यासाठी कोणती विकासकामे केली जातील याबाबतचा अजेंडा वाचून दाखवला. कोल्हापूर सांगली साताऱ्यासाठी इंडस्ट्रियल काॅरिडाॅर करणार असल्याचे त्यांनी सांगितले. 

सतेज पाटील: महाराष्ट्रामध्ये शेतकऱ्यांच्या सर्वाधिक आत्महत्या होत आहेत आणि आत्महत्यांना एकनाथ शिंदे, देवेंद्र फडणवीस आणि अजित पवार थेट कारणीभूत असल्याची घणाघाती टीका काँग्रेस जिल्हाध्यक्ष तथा आमदार सतेज पाटील यांनी केली. आज (16 नोव्हेंबर) कोल्हापूरमध्ये कोल्हापूर जिल्ह्यातील काँग्रेस तसेच महाविकास आघाडीच्या उमेदवारांच्या प्रचारार्थ काँग्रेस नेत्या प्रियांका गांधी यांची सभा गांधी मैदानामध्ये आयोजित करण्यात आली. या सभेमध्ये बोलताना सतेज पाटील यांनी जोरदार हल्ला चढवला. 

यांना जागा दाखवून देण्याची वेळ आली आहे 

सतेज पाटील म्हणाले की इंदिरा गांधींची मध्यरात्री सभा ज्या ठिकाणी झाली होती, लोकांनी उत्स्फूर्तपणे त्यांचे स्वागत केले होते आणि आजही त्याच पद्धतीने तुमचं (प्रियांका गांधी) या मैदानामध्ये उत्स्फूर्तपणे स्वागत होत आहे. 1976 मध्ये काळम्मावाडी धरणाचे लोकार्पण करण्यासाठी इंदिरा गांधी या ठिकाणी आल्या होत्या आणि आम्ही सुद्धा त्याच धरणातून कोल्हापूरसाठी पाणी देत असल्याचे आठवण सतेज पाटील यांनी यावेळी करून दिली. ते म्हणाले की, आम्ही फुले,शाहू, आंबेडकरांचा वारसा पुढे घेऊन जात आहोत. महाविकास आघाडीचे कार्यकर्ते हे निष्ठावंत कार्यकर्ते आहेत. राज्यात फोडाफोडीचे राजकारण होत असताना ही निष्ठावंतांची फळी आपल्या स्वागतासाठी उभी असल्याचे ते म्हणाले. महिलांचा सन्मान न करण्याची प्रवृत्ती दिसून येत आहे. यांना जागा दाखवून देण्याची वेळ आली असल्याची टीका पाटील यांनी केली. राज्यांमध्ये महागाईने कंबरडं मोडलं आहे. कोट्यवधींचे प्रकल्प गुजरातला नेले आहेत आणि विद्यार्थ्यांची सुद्धा आंदोलने झाली आणि महायुतीच्या काळामध्ये राज्यातील इतिहासामध्ये सर्वाधिक आंदोलन झाल्याची टीका सुद्धा पाटील यांनी केली.

यावेळी बोलताना पाटील यांनी कोल्हापूर सांगली साताऱ्यासाठी कोणती विकासकामे केली जातील याबाबतचा अजेंडा वाचून दाखवला. कोल्हापूर, सांगली व साताऱ्यासाठी इंडस्ट्रियल काॅरिडाॅर करणार असल्याचे त्यांनी सांगितले. 

दरम्यान, काँग्रेस महाविकास आघाडीच्या उमेदवारांसाठी प्रियंका गांधींच्या शिर्डी व कोल्हापूरात प्रचारसभा झाल्या. यावेळी बोलताना त्यांनी भाजपा व नरेंद्र मोदी यांच्यावर तुफान हल्लाबोल केला, राहुल गांधी यांनी बाळासाहेब ठाकरेंचे नाव घ्यावे या पंतप्रधान नरेंद्र मोदींच्या आव्हानाला उत्तर देत प्रियंका गांधी म्हणाल्या की, बाळासाहेब ठाकरेंची शिवसेना व काँग्रेस पक्षाची विचारधार वेगळी आहे पण बाळासाहेब ठाकरे यांच्याबद्दल काँग्रेस पक्षाला नितांत आदर आहे, असे स्पष्ट सांगून शिवसेना वा काँग्रेसचा कोणताही नेता छत्रपती शिवाजी महाराज यांचा अपमान कदापी सहन करणार नाही असे बजावले. राहुल गांधी यांनी बाळासाहेब ठाकरेंचे नाव घ्यावे असे आव्हान देणाऱ्या पंतप्रधान नरेंद्र मोदी व अमित शाह यांनी खुल्या व्यासपीठावरून जातनिहाय जनगणना करणार व ५० टक्क्यांची मर्यादा हटवणार ही घोषणा करुन दाखवावी, असे प्रतिआव्हानही प्रियंका गांधी यांनी दिले आहे.

मुन्ना महाडिकचा भांग देखील कोण वाकडा करू शकेल, असा कोणी पृथ्वीवर जन्माला आलेला नाही : धनंजय महाडिक

उद्धव साहेब मी तुमची माफी मागतो, मला तुमचा अवमान करायचा नाही, पण मी सांगतो मुन्ना महाडिकाचा भांग देखील कोण वाकडा करू शकत नाही, असा कोण पृथ्वीवर जन्माला आलेला नाही, असे महाडिक म्हणाले. 

कोल्हापूर: कोल्हापूर जिल्हा अविकसित ठेवण्याचं काम सतेज पाटील यांनी केलं आहे. सतेज पाटील खुनशी आहेत हे विश्वजित कदम यांच्या वक्तव्याने सिद्ध झालं. मुबलक पाणी देऊ म्हणून स्वतः आंघोळ करून घेतली, पण जनतेला पाणी मिळत नाही अशा शब्दात खासदार धनंजय महाडिक यांनी सतेज पाटील यांच्यावर हल्लाबोल केला. 

कोणी मुन्ना महाडिकचा भांग देखील वाकडा करू शकत नाही

दरम्यान, लाडकी बहिणींना धमकावून अडचणीत सापडलेल्या शिवसेना पक्षप्रमुख उद्धव ठाकरे यांच्या टीकेला खासदार धनंजय महाडिक यांनी प्रत्युत्तर दिले. महाडिक म्हणाले की, लाडकी बहीण बाबत माझ्या वक्तव्याचा विपर्यास करण्यात आला. मी तातडीने बहिणींची माफी मागितली, पण सतेज पाटील यांनी छत्रपती घराण्यातील सुनेला ज्या शब्दात बोलले त्यावर त्यांनी माफी मागितली नाही. उद्धव ठाकरे प्रत्येक सभेत जाऊन सांगत आहेत, की मुन्ना महाडिक यांचा हात तोडा, पाय तोडा असं म्हणतात. उद्धव साहेब मी तुमची माफी मागतो, मला तुमचा अवमान करायचा नाही, पण मी सांगतो मुन्ना महाडिकाचा भांग देखील कोण वाकडा करू शकत नाही, असा कोण पृथ्वीवर जन्माला आलेला नाही. उद्धव साहेब आपल्या भाषणाचा कोणतरी गैरफायदा घेतील म्हणून आज हे मला बोलावं लागतं, असे महाडिक म्हणाले. 

समरजितसिंह घाटगे हे स्वत: सीए आहेत, त्यांना गणित चांगलं कळतं: शाहू महाराज 

शाहू महाराज: कागल आणि महाराष्ट्रात परिवर्तन केल्याशिवाय गत्यंतर नाही आणि महाराष्ट्र जनता परिवर्तन नक्की करेल ही शंका नसल्याचेही शाहू महाराज यावेळी म्हणाले. 

शाहू महाराज: कोल्हापूर उत्तरमध्ये उमेदवारीवरून झालेल्या घडामोडीनंतर छत्रपती घराण्याने राजेश लाटकर यांच्या प्रचारामध्ये सक्रिय सहभाग घेतल्यानंतर आता कागलमध्ये राष्ट्रवादी काँग्रेस शरदचंद्र पवार पक्षाचे नेते समरजितसिंह घाटगे यांच्या प्रचारासाठी सुद्धा आता सक्रियपणे सहभाग घेतला आहे. आज गडिंग्लजमध्ये राष्ट्रवादी काँग्रेस शरदचंद्र पवार पक्षाचे अध्यक्ष शरद पवार यांची घाटगे यांच्या प्रचारार्थ सभा पार पडली. या सभेसाठी खासदार शाहू महाराज सुद्धा उपस्थित राहिले. यावेळी बोलताना शाहू महाराज यांनी चांगली टोलेबाजी केली. कागल आणि महाराष्ट्रात परिवर्तन केल्याशिवाय गत्यंतर नाही आणि महाराष्ट्र जनता परिवर्तन नक्की करेल ही शंका नसल्याचेही शाहू महाराज यावेळी म्हणाले. 

मी पुरोगामी आहे असं काही जण म्हणत होते

शाहू महाराज म्हणाले की, समरजितसिंह घाटगे कोणतेही पद नसताना सातत्याने काम करत आहेत. त्यांनी अनेक मंजुरी आणल्या आहेत. त्यामुळे त्यांचं कौतुक केले पाहिजे. शाहू महाराज पुढे म्हणाले की ते स्वतः सीए असल्याने त्यांना गणित चांगलं कळतं. आपल्याला महाराष्ट्र खंडणी मुक्त आणि भ्रष्टाचारमुक्त करायचं आहे, असं त्यांनी सांगितलं. मी पुरोगामी आहे असं काही जण म्हणत होते, मात्र फुले शाहू आंबेडकर यांचे विचार सोडून गेले, असा टोला शाहू महाराजांनी लगावला.

ते पुढे म्हणाले की, आपल्या लाडक्या बहिणींना आपण तीन हजार रुपये देणार आहेत. महाराष्ट्र एक नंबरवर आणायचा आहे, त्यासाठी समरजित घाटगे यांना निवडून द्या, असे आवाहन त्यांनी केले. कागलमध्ये लोकसभेला विरोधकाने म्हटलं होते की शाहू महाराजांवर दोन लाखांचे लीड असेल. मात्र, विरोधकांची सगळी गणिते बिघडली, असा टोलाही त्यांनी लगावला.

शरद पवारांची चंदगडकरांना साद

दरम्यान, चंदगडमध्येही शरद पवार यांची सभा पार पडली. शरद पवार म्हणाले की, संध्यादेवी यांची इच्छा नसताना आम्ही त्यांना आमदार केलं. आता बाबासाहेब त्यांच्याप्रमाणे वेगानं काम करणारे आणि इथल्या लोकांशी जुळवून घेणारे नेतृत्व नंदाताई यांच्याशिवाय दुसरे कुणी नाही आणि मला खात्री आहे आमची निवड 23 तारखेला योग्य ठरेल, असा विश्वास राष्ट्रवादी शरदचंद्र पवार पक्षाचे अध्यक्ष शरद पवार यांनी चंदगडमधील सभेत व्यक्त केला. फसवणूक करणाऱ्यांना शिक्षा द्यायची असेल तर नंदाताई यांना निवडून द्या, नंदाताई तुमच्या माझ्या कन्या आहेत, आपल्या सगळ्यांची जबाबदारी आहे नंदाताईच्या पाठीशी उभा रहायचं, असे शरद पवार यांनी सांगितले.

      

Contact For News, Advertising& Promotions:

www.kolhapurnews24hrs.in

kolhapurnews26@gmail.com

'लाडक्या बहिणीं' वर वादग्रस्त वक्तव्य, चौफेर टीकेनंतर भाजप खासदाराचा माफीनामा

लाडकी बहीण योजनेचा फायदा घेऊनही काँग्रेसच्या प्रचारात दिसणाऱ्या महिलांचा कार्यक्रम करणार असल्याचे वक्तव्य महाडिक यांनी केले होते. त्यावर आता त्यांनी माफी मागितली आहे. 

कोल्हापूर: भाजप खासदार धनंजय महाडिक यांनी लाडकी बहीण योजनेचा लाभ मिळणाऱ्या महिलांबाबत केलेल्या वक्तव्यावरून वाद निर्माण झाला होता. लाडकी बहीण योजनेचा फायदा घेऊनही काँग्रेसच्या प्रचारात दिसणाऱ्या महिलांचा कार्यक्रम करणार असल्याचे वक्तव्य महाडिक यांनी प्रचारसभेत केले होते. त्यानंतर धनंजय महाडिक यांच्यावर चौफेर टीका झाली. या टीकेनंतर आता खासदार महाडिकांनी माफी मागितली आहे. धनंजय महाडिक यांनी एक निवेदन जारी केले आहे.

महायुतीच्या उमेदवाराच्या प्रचारसभेत बोलताना महाडिक यांनी हे वक्तव्य केले होते. काँग्रेस नेते आमदार सतेज पाटील यांच्यासह विरोधकांनी महाडिक यांच्या वक्तव्यावर संताप व्यक्त केला होता. महाडिक आणि भाजपची मानसिकता या निमित्ताने समोर आली असल्याचे विरोधकांनी म्हटले. आपल्या वक्तव्यावरून वाद सुरू झाल्याचे दिसताच, महाडिक यांनी काँग्रेसने विपर्यास केले असल्याचे स्पष्टीकरण दिले होते. ‘त्यांचा फोटो काढा बंदोबस्त करू, या वक्तव्याचा विपर्यास केला गेला आहे. एवढ्यासाठी सांगितलं की या महिलांना कदाचित त्या योजनेचा लाभ मिळाला नसेल, तर आपण त्यांना लाभ देण्याची व्यवस्था करू. हे सांगण्याची माझी भूमिका होती,  असे महाडिक यांनी म्हटले होते. वक्तव्याचा विपर्यास करण्याचं काम काँग्रेसचं आहे, त्यात चुकीचं काही नाहीये. महायुतीच्या योजनेचा लाभ घ्यायचा आणि मग दुसऱ्याचं गुणगान गायचं, असं कसं? त्यामुळे या महिलांनी आपल्यासोबत राहिलं पाहिजे. ज्या येत नसतील त्यांना कदाचित लाभ मिळाला नसेल, त्यांनाही लाभ मिळावा, ही माझी भूमिका होती’, असं धनंजय महाडिक म्हणाले. मात्र, आता त्यांनी आपल्या वक्तव्यावर माफी मागितली आहे. 

धनंजय महाडिकांनी निवेदनात काय म्हटले?

सर्वप्रथम माझ्या वक्तव्याने कुठल्याही माता भगिनींचे मन दुखावले असेल, तर त्यांची माफी मागतो. माझे हे वक्तव्य कुठल्याही माता भगिनीचा अपमान करण्यासाठी मुळीच नव्हते. तर निवडणूक काळात राजकीय प्रचार करताना, विरोधी पक्षाच्या खोट्या प्रचाराला बळी पडणाऱ्या महिलांना, लाडकी बहीण योजना ही फक्त महायुती सरकारमुळेच यशस्वी झाली असल्याचे ठामपणे नमूद करताना, चुकून आलेली प्रतिक्रिया आहे. मी माझ्या वैयक्तिक , राजकीय आयुष्यात महिलांचा नेहमीच सन्मान करत आलेलो आहे. मी आणि माझ्या पत्नी मार्फत गेली 16 वर्षे भागीरथी महिला संस्थेमार्फत महिलांच्या आत्मनिर्भरतेसाठी नेहमीच सकारात्मक काम करत आलो आहे आणि ह्या पुढे देखील करत राहीन. महिलांचा सन्मान आणि सशक्तीकरण बाबत, आम्ही नेहमीच प्रयत्नशील आहोत. तरीही माझ्या वक्तव्याने मन दुखावलेल्या माझ्या भगिनी मला मोठ्या मनाने माफ करतील, अशी आई अंबाबाईच्या चरणी मी प्रार्थना करतो. 

धनंजय महाडिक यांनी काय म्हटले होते?

काँग्रेसच्या सभेत महिला दिसल्या जाऊन फोटो काढायचे. काँग्रेसच्या रॅलीत महिला दिसल्या जाऊन फोटो काढायचे. ज्या 1500 रुपये आपल्या योजनेचे घेतात, त्यांचे फोटो काढून घ्या, नावे लिहून घ्या…म्हणजे घ्यायचं आपल्या शासनाचे आणि गायचं त्यांचे असं चालणार नाही. काँग्रेसच्या सभेत महिला दिसल्या, काँग्रेसच्या रॅलीत महिला दिसल्या की आमच्याकडे फोटो द्या, आम्ही त्यांची व्यवस्था करतो. आम्हाला पैसे नको सुरक्षा हवी, असं म्हणत लय मोठ्याने कोण भाषण करु लागली, किंवा दारात आली तर लगेच फॉर्म देऊन सही घ्यायची आणि पैसे बंद करुन टाकायचे. आमच्याकडे काय पैसे लय झालेले नाहीत, असेही महाडिक यांनी म्हटले.

लाडकी बहीण योजने विरोधात मविआला 'महालक्ष्मी' पावणार..?

महायुतीच्या लाडकी बहीण योजनेविरोधात महाविकास आघाडीने महालक्ष्मी योजना आणली आहे.

लोकसभा निवडणुकीत पराभवाचा धक्का बसल्यानंतर राज्यातील सत्ताधारी महायुतीने महिलांसाठी मुख्यमंत्री लाडकी बहीण योजना आणि इतर योजना सुरू केल्या. या योजनांना चांगला प्रतिसाद मिळत आहे. महायुतीसाठी आगामी विधानसभा निवडणुकीसाठी या योजना गेमचेंजर ठरणार असल्याचे म्हटले जात आहे. तर, दुसरीकडे महाविकास आघाडीने महिला मतदारांकडे वळवण्यासाठी मोठ्या घोषणा केल्या आहेत. लाडकी बहीण योजनेविरोधात महाविकास आघाडीने महालक्ष्मी योजना आणली आहे. यात दरमहा मानधनाशिवाय इतरही फायदे आहेत. तेलंगणा, कर्नाटक सरकारच्या योजनांच्या धर्तीवर या योजना आहेत. 

महायुतीकडून महिला मतदारांना साद…

महायुती सरकारच्या लाडकी बहीण योजनेत पात्र महिलांना दरमहा 1500 रुपये देण्यात येत आहे. त्याशिवाय, महायुती सरकारने महिलांना एसटी बस प्रवासाच्या तिकीट दरात 50 टक्के सवलत जाहीर केली आहे. या योजनांचा फायदा महिलांना विशेषत: ग्रामीण भागात होत आहे. लोकसभा निवडणुकीत महागाई आणि इतर मुद्यांवरून दूर गेलेला महिला मतदार खेचण्यासाठी या योजना सुरू झाल्याचे म्हटले जाते. तर, दुसरीकडे महिला मतदारांसाठी महाविकास आघाडीनेदेखील कंबर कसली आहे. महिला मतदारांना केंद्रस्थानी ठेवत मविआने काही महत्त्वाच्या योजना जाहीर केल्या आहेत.

महाविकास आघाडीची आश्वासने काय?

महाविकास आघाडीने महालक्ष्मी योजना लागू करण्याचे आश्वासन दिले आहे. राज्यात महाविकास आघाडीची सत्ता आल्यास महिलांच्या बँक खात्यात दरमहा 3000 रुपये जमा करण्यात येतील. त्याशिवाय, महिलांना राज्यभरात बस प्रवास मोफत करण्यात येईल. स्थानिक स्वराज्य संस्था पातळीवरही हा निर्णय लागू होण्याची शक्यता आहे. ठाकरे गटाचे नेते आदित्य ठाकरे यांनी मुंबईत बेस्टचा प्रवास मोफत करणार असल्याची घोषणा केली आहे. त्याशिवाय, महिलांना मासिक पाळी दरम्यान दोन दिवसांची ऐच्छिक रजा देण्याचे आश्वासन महाविकास आघाडीच्या जाहीरनाम्यात करण्यात आले आहे. महाराष्ट्रील महिलांसाठी सुरक्षित महाराष्ट्र महत्वाचा असल्याचे सांगत महिला सुरक्षेवर भर देणार असल्याचे मविआच्या नेत्यांनी म्हटले आहे.

महायुतीने महिलांसाठीच्या लाडकी बहीण योजनेसाठी 2100 रुपये जाहीर केले आहेत. सत्तेत पुन्हा आल्यास लाडीक बहीण योजनेतील रक्कमेत वाढ करून ही रक्कम 2100 रुपये करण्यात येणार आहे. त्याशिवाय, एसटीच्या प्रवासात महिलांना असलेली तिकीट दरातील 50 टक्के कपात सुरू राहणार आहे.

आता विधानसभा निवडणुकीत महिला मतदारांचे पारडं कोणाकडे झुकणार, लाडक्या बहिणी महायुतीला साथ देणार की, महालक्ष्मी होऊन महाविकास आघाडीला मतदानरुपी आशिर्वाद देणार हे निकालाच्या दिवशी स्पष्ट होईल.

Contact For News, Advertising& Promotions:

www.kolhapurnews24hrs.in

kolhapurnews26@gmail.com

निवडणूक रणझुंजार

लढायचं नव्हतं तर आधीच सांगायचं होतं, मला कशाला तोंडघशी पाडलं..?

 दम नव्हता तर उभं राहायचं नव्हतं ना मग, मी पण दाखवली असती माझी ताकद. सतेज पाटील शाहू महाराजांसमोर भडकले.  

कोल्हापूर: अर्ज माघारीच्या शेवटच्या दिवशी कोल्हापुरात जोरदार राजकीय राडा झाल्याचं दिसून आलं. कोल्हापूर उत्तरच्या काँग्रेसच्या उमेदवार मधुरिमाराजेंनी शेवटच्या क्षणी अर्ज माघार घेतला. महाविकास आघाडी आणि सतेज पाटलांसाठी हा मोठा धक्का असल्याचं म्हटलं जातंय. मधुरिमाराजेंच्या अर्ज माघारीसाठी प्रत्यक्ष शाहू महाराजांचाच दबाव असल्याचं समोर आलं. शाहू महाराजांच्या आदेशानंतर मालोजीराजेंनी मधुरिमाराजेंचा हात पकडत बाहेर आणलं आणि उमेदवारी अर्ज माघारी घेतला. त्या ठिकाणचा व्हिडीओ आता चांगलाच व्हायरल होतोय. 

कोल्हापूर उत्तर विधानसभेसाठी आधी माजी नगरसेवक राजू लाटकर यांच्या नावाची घोषणा करण्यात आली होती. मात्र काँग्रेसने एका दिवसात उमेदवारी बदलली आणि मधुरिमाराजे छत्रपती यांना उमेदवारी दिली. मात्र एकाच घरात दोन दोन पदं नको अशी भूमिका शाहू महाराजांची होती अशी माहिती आहे. त्यामुळेच शाहू महारांच्या आदेशानंतर मधुरिमाराजे छत्रपती यांनी शेवटच्या क्षणी आपली उमेदवारी मागे घेतल्याची चर्चा आहे. काँग्रेसचे बंडखोर राजू लाटकर यांनी माघार घेण्यास नकार दिल्यानंतर काँग्रेससमोर पेच निर्माण झाला होता. त्या दरम्यान, राजू लाटकर यांनी शाहू महाराजांची दोन वेळा भेट घेतल्याची माहिती आहे. त्यानंतर मधुरिमाराजे यांनी उमेदवारी मागे घेतली. मधुरिमाराजे यांनी उमेदवारी मागे घ्यावी यासाठी शाहू महाराजांनी आदेश दिला. मधुरिमाराजेंनी मालोजीराजेंसमोर माघारी अर्जावर सही करण्याचे आदेश शाहू महाराजांनी दिले. त्यानंतर मालोजीराजेंनी मधुरिमाराजेंचा हात पकडला आणि त्यांना घेऊन बाहेर आले. त्यानंतर मधुरिमाराजेंनी त्यांचा उमेदवारी अर्ज मागे घेतला. यादरम्यान त्या ठिकाणी उपस्थित असलेल्या सतेज पाटलांचा पारा मात्र चांगलाच चढल्याचं दिसून आलं. त्यांनी शाहू महाराजांसमोर नाराजी व्यक्त केली. लढायचं नव्हतं तर आधीच सांगायचं होतं, मला कशाला तोंडघशी पाडलं असं त्यांनी विचारलं. माझी फसवणूक केली, हे काही बरोबर झालं नाही असंही ते म्हणाले. 

ज्या लोकांनी आग लावण्याचं काम केलं त्यांना सोडणार नाही असा दमही सतेज पाटलांनी शाहू महाराजांच्या अवती-भोवती असणाऱ्या लोकांना दिला. त्यानंतर जिल्हाधिकारी कार्यालयातून बाहेर आल्यानंतरही ते भडकले. 'जर तुमच्यात दम नव्हता तर कशाला उभं राहिलात, मी पण माझी ताकद दाखवली असती' असं सतेज पाटलांनी शाहू महाराजांच्या जवळच्या लोकांना उद्देशून म्हटलं.

अमित ठाकरे: दिशा सालियान मृत्यू प्रकरण, आदित्य ठाकरेंवरील आरोपांवर अमित ठाकरे पहिल्यांदाच बोलले

अमित ठाकरे: शिवसेना ठाकरे गटाचे नेते आणि माजी मंत्री आदित्य ठाकरे यांच्यावर अनेकदा दिशा सालियान मृत्यू प्रकरणावरून टीका केली जाते. त्यासोबतच अभिनेता सुशांत सिंहची हत्या झाली असून त्यामध्ये आदित्य ठाकरेंचा हात असल्याचा आरोप राणेंनी केला होता. या प्रकरणावर मनसे नेते अमित ठाकरे यांनीआपली प्रतिक्रिया दिली आहे. शिवसेना उबाठा गटाचे नेते आदित्य ठाकरे यांच्यावर अनेकदा दिशा सालियान प्रकरणावरून आरोप केले जातात. बॉलिवुड अभिनेता सुशांत सिंह यांचाही मृत्यूमागे आदित्य ठाकरेंचा हात असल्याचं आरोप भाजप नेते आणि खासदार नारायण राणे यांनी अनेकदा केला आहे. राज्यात महाविकास आघाडीचे सरकार असताना सुशांत सिंह याने कोरोना काळात राहत्या घरामध्ये गळफास घेत आत्महत्या केली होती. सुशांत सिंहची हत्या झाल्याची गंभीर टीका राणेंनी अनेकदा केली आहे. या प्रकरणावर मनसे प्रमुख राज ठाकरे यांचे सुपुत्र अमित ठाकरे यांनी आपली प्रतिक्रिया दिली आहे. आमची आता मैत्री आणि संवाद नाही, समोर आल्यावर हाय बोलेल पण संवाद होणार नाही. २०१७ वेळी खरं काय आणि खोटं काय हे आम्ही पाहिलेलं आहे. आम्ही परिवार आणि नाती म्हणून पथ्य पाळतो, मला पण वाटतं आदित्यचा दिशा सालियान प्रकरणामध्ये समावेश नसेल. मर्डरवगैरे लेव्हलला तो जाईल असं मला वाटत नाही, हे माझं मत आहे, असं अमित ठाकरे यांनी म्हटलं आहे.

आमच्या पक्षाची बैठक सुरू होती तेव्हा मला वाटलं की माझा कुठे फायदा होणार असेल तर मी तयार असल्याचं सांगितलं. मलासुद्धा यादी येईपर्यंत माहित नव्हतं की माहीममधून लढणार आहे. हा निर्णय साहेबांचा (राज ठाकरे) होती. मला अपेक्षा होती उद्धव ठाकरे उमेदवार देतील. साहेब नाती जपण्याचा निर्णय घेतात, आम्ही यावर्षीसुद्धा उमेदवार देणार नव्हतो पण कुठेही काम दिसलं नाही, लोकांमध्ये नाराजी आहे. त्यामुळे तिथे आम्ही वरळीमध्ये उमेदवार देण्याचा निर्णय घेतल्याचं अमित ठाकरेंनी सांगितलं.

ठाकरेंसारखा माणूस सापडणार नाही, सरवणकरांच्या नावे पोस्ट व्हायरल

        माहीम विधानसभा मतदारसंघातून उमेदवारी मागे घेण्यास शिवसेनेचे विद्यमान आमदार सदा सरवणकर यांच्यावर दबाव असल्याची चर्चा आहे. मात्र मुख्यमंत्री एकनाथ शिंदे आणि सरवणकर निवडणूक लढण्यावर ठाम आहेत. अशातच सरवणकर यांच्या नावे एक खोटा फोटो सोशल मीडियावर व्हायरल झाला आहे. सरवणकर हे उद्धव ठाकरे यांची स्तुतिसुमनं गात असल्याचं या फेक पोस्टमध्ये म्हटलं आहे. याविषयी सदा सरवणकर यांचे सुपुत्र समाधान सरवणकर यांनी फेसबुकवर पोस्ट लिहित ठाकरे गटावर निशाणा साधला आहे.

सदा सरवणकर यांच्या नावे व्हायरल झालेली खोटी पोस्ट काय?

"आज जेव्हा माझ्यावर उमेदवारी मागे घेण्यासाठी दबाव येतो तेव्हा मला उद्धव ठाकरे आठवतात. त्यांची साथ सोडली त्याचा परिणाम मी आज भोगतोय, सत्ता असेल नसेल पण उद्धव ठाकरेंसारखा माणूस राजकारणात सापडणार नाही" अशी पोस्ट शिवसेनेचं भगवं वादळ नावाच्या अकाऊण्टवरुन शेअर करण्यात आली होती.

सदा सरवणकर नेमकं काय म्हणाले होते?

"माहीम विधानसभेतील प्रत्येक गल्लीत, घरात माझ्या कामामुळे माझी ओळख निर्माण झाली आहे. काम करणाऱ्या व्यक्तीबरोबर कुणी अन्याय करत असेल तर त्यावर निश्चितच प्रतिक्रिया उमटणार आणि मतदारसंघातून प्रतिक्रिया उमटताना दिसत आहे." असं सरवणकर प्रत्यक्षात म्हणाले होते.

समाधान सरवणकर यांची फेसबुक पोस्ट काय?

"ही उबाठा किती घाबरली आहे हे या वरून समजते आहे. मुख्यमंत्री असताना जर घरातून बाहेर पडले असते तर हे असा खोटा प्रचार करायला लागला नसता. वाघ एकाला राजा...." असं समाधान सरवणकर यांनी पोस्टमध्ये म्हटलं आहे.

सरवणकरांची मनसेसमोर अट

‘मनसेने महायुतीविरोधात सर्वत्र उमेदवार उभे केले असून त्यांनी महायुतीच्या विरोधात उभे केलेले उमेदवार मागे घेतले, तर मीही पक्षासाठी त्याग करण्यास तयार आहे. दादर-माहीम मतदारसंघातील उमेदवारी मागे घेण्यास तयार आहे,’ असे वक्तव्य शिवेसनेचे आमदार सदा सरवणकर यांनी केले आहे. एकनाथ शिंदे हे पुन्हा मुख्यमंत्री व्हावेत, ही सर्वसामान्यांची इच्छा आहे, असेही ते यावेळी म्हणाले. आता त्यांनी समजुतीची भूमिका घेत एक पाऊल पुढे टाकले आहे. ‘मनसेने महायुतीविरोधात सगळ्याच ठिकाणी आपले उमेदवार उभे केले आहेत. त्यामुळे महायुतीविरोधात उभे केलेले उमेदवार मनसेने मागे घ्यावेत. त्यानंतर मी पक्षासाठी उमेदवारी मागे घेण्यास तयार आहे, मी पक्षासाठी त्याग करण्यास तयार आहे,’ असे सरवणकर यांनी स्पष्ट केले.

                                 

Contact For News, Advertising& Promotions:

www.kolhapurnews24hrs.in

kolhapurnews26@gmail.com

समरजितसिंह घाटगेंची संपत्ती कितीशे कोटींच्या घरात..?

समरजीतसिंह घाटगे यांची एकूण संपत्ती: वडिलोपार्जित जमीन 115 कोटींवर; समरजितसिंह घाटगेंची संपत्ती कितीशे कोटींच्या घरात..?

समरजितसिंह घाटगे यांच्या पत्नी निवेदिता घाटगे यांच्याकडे 9 कोटी 6 लाख 41 हजार रुपयांची संपत्ती आहे. समरजित घाटगे यांच्या नावावर 14 लाख 58 हजार रुपयांच कर्ज आहे.

कोल्हापूर: कोल्हापूर जिल्ह्याचे राजकीय विद्यापीठ समजले जाणाऱ्या कागल विधानसभेमध्ये वैद्यकीय शिक्षण मंत्री तथा कोल्हापूरचे पालकमंत्री हसन मुश्रीफ आणि राष्ट्रवादी काँग्रेस शरदचंद्र पवार पक्षाचे नेते समरजितसिंह घाटगे यांच्यामध्ये तुल्यबळ लढत होत आहे. कागलमध्ये जरी अपक्ष आणि मनसेनं उमेदवार दिला असला, तरी समरजितसिंह घाटगे आणि हसन मुश्रीफ यांच्यामध्येच होणार आहे. गेल्या अनेक महिन्यांपासून या दोन नेत्यांमध्ये चांगलाच कलगीतुरा रंगला आहे. आरोप प्रत्यारोपांच्या फैरी होत आहेत. त्यामुळे विधानसभा निवडणुकीत सुद्धा आरोप प्रत्यारोपांच्या फैरी आणखी द्वेषाने झाडल्या जातील, यामध्ये काही शंका नाही.  

समरजितसिंह घाटगे यांच्याकडे 159 कोटी 89 लाख 9 हजार रुपयांची संपत्ती.

कागल विधानसभा मतदारसंघातील उमेदवार समरजितसिंह घाटगे यांनी 159 कोटी 89 लाख 9 हजार रुपयांची संपत्ती असल्याचं निवडणूक आयोगाकडे सादर केलेल्या प्रतिज्ञापत्रात म्हटलं आहे. समरजित यांच्या पत्नी निवेदिता घाटगे यांच्याकडे 9 कोटी 6 लाख 41 हजार रुपयांची संपत्ती आहे. समरजित घाटगे यांच्या नावावर 14 लाख 58 हजार रुपयांच कर्ज आहे. त्यांच्या पत्नीवर 32 लाख 18 हजार रुपयांचं कर्ज आहे. रोख रक्कम, ठेवी, शेअर्स, दागिने, शेतजमीन, इमारती इत्यादी मालमत्तेचा समावेश आहे. समरजित यांच्याकडे एक लाख 58 हजार रुपये रोख आणि चार कोटी एक लाख 48 रुपये हजार रुपयांच्या ठेवी आहेत. विविध कंपन्यांचे 61 लाख रुपयांचे शेअर्स आणि 35 लाखांची वाहने त्यांच्या नावावर आहेत. समरजित घाटगे यांच्या वडिलोपार्जित जमिनीची किंमत 115 कोटी आणि पत्नीकडे सहा कोटींची जमीन आहे. 

मी उपमुख्यमंत्री होऊ शकतो, हसन मुश्रीफांचा दावा

दरम्यान, कागल विधानसभा मतदारसंघात हसन मुश्रीफ यांनी प्रचंड शक्तीप्रदर्शनाने उमेदवारी अर्ज दाखल केला. यावेळी कार्यकर्त्यांनी मोठी गर्दी केली होती. यावेळी बोलताना मुश्रीफ यांनी मी उपमुख्यमंत्री होऊ शकतो, असे म्हटले आहे. ते म्हणाले की, राज्यात आमची पुन्हा सत्ता आली तर मला मंत्रिपद मिळेल. मी मुख्यमंत्री नाही पण झालो तर उपमुख्यमंत्री होऊ शकतो. काही राज्यात दोन, तीन उपमुख्यमंत्री होऊ शकतात मग आपल्याकडे का होऊ शकत नाहीत. पण काही लोकांचे गावात ग्रामपंचायत सदस्य नाहीत त्यांना मत देऊन फुकट घालवू नका, असा टोला त्यांनी समजरजित यांना लगावला.

एक दिवाळी अशीही

आजरा: एकीकडे निवडणुकीची धावपळ, खेचाखेची सुरु असताना मान्यवर पुढारी व त्यांचे कार्यकर्ते भर दिवाळी मध्ये हॉटेल व धाब्यांवर मनसोक्त जेवणाचा आस्वाद घेताना दिसत आहेत. तेच दुसऱ्या बाजूला स्वतःचे गाव व घरदार सोडून पोटाची खळगी भरण्यासाठी काही लोक दूरवरून आजरा येथे राहायला आलेले आपल्याला दिसून येत आहेत. दैनंदिन कामातून वेळ काढून सन-समारंभ साजरा करणे म्हणजे त्यांच्यासाठी पोटावर दगडच ठेवणे जणू. या गोष्टींचा विचार करून त्यांनाही दिवाळीचा आनंद घेता यावा यासाठी सुभाष कांबळे मित्रपरिवारा मार्फत काही गरीब कुटुंबांना व मुस्लिम बांधवांना फराळ वाटप करून यंदाची दिवाळी साजरी करण्यात आली. यावेळी सुभाष कांबळे, स्वप्निल गुरव, प्रकाश शिंदे, गणेश कांबळे, सिद्धार्थ कांबळे, बबन कांबळे, शुभम कांबळे आदी उपस्थित होते. यासाठी सतीश बामणे यांनी विशेष सहकार्य केले.

गोमांस तस्करीप्रकरणी दोघांवर गुन्हा दाखल: चंदगड पोलिसांची कारवाई

        तिलारी घाटातून गोमांसाची तस्करी करणाऱ्यांचा स्थानिकांनी पर्दाफाश केल्यानंतर तस्करी करणाऱ्या दोघांवर चंदगड पोलिसांनी कारवाई केली. संशयित सय्यद इस्माईल सय्यद अल्लाउद्दिन मिरचोनी(वय ४८, रा. पेडामेल, केपे, दक्षिण गोवा) व अमोल विद्याधर मोहनदास(वय ४०, रा. सह्याद्री नगर, बेळगाव) अशी त्यांची नावे आहेत. तस्करीत एकूण २६ लाखांचे गोमांस जप्त करून विल्हेवाट लावल्याची माहिती चंदगड पोलिसांनी दिली.

        तिलारी घाटातून अवजड वाहनांसह एसटी वाहतुकीला बंदी आहे. तसेच निवडणुकीच्या पार्श्वभूमीवर घाटाच्या माथ्यावर व पायथ्याशी स्थिर सर्वेक्षण पथकाचे तपासणी नाके आहेत. बेळगाव ते गोवा अशी गोमांस तस्करी करणारा एक अवजड ट्रक घाटमाथ्यावरील तपासणी नका ओलांडून तिलारी घात उतरत होता. दरम्यान टरकत अचानक बिघाड झाल्याने घाटात अडकला. घाटात अवजड वाहन कसे आले...? याचा जाब विचारण्यासाठी स्थानिक गेले. त्यामुळे गोमांस तस्करी करणाऱ्यांचे भिंग फुटले. ट्रकात मोठ्या प्रमाणात गोमांस असल्याची बातमी सिंधुदुर्ग, कोल्हापूर, बेळगाव व गोव्यात पसरताच गोरक्षकांनी तिलारी घाटाकडे धाव घेतली. गोमांस तस्करी करणाऱ्यांवर कठोर कारवाई करावी, अशी मागणी लावून धरली. पोलीस, वन विभाग व फोरेन्सिक टीम देखील घटनास्थळी दाखल झाली व त्यांची कार्यवाही सोमवारी (ता. २८) सायंकाळी उशिरापर्यंत सुरु होती. गोमांस तस्करी करणाऱ्या संशयित सय्यद इस्माईल सय्यद अल्लाउद्दिन मिरचोनी व अमोल विद्याधर मोहनदास या दोघांवर चंदगड पोलिसांनी गुन्हा दाखल केला आहे. तसेच १५ लाख रुपये किंमतीचे सुमारे १० टन गोमांस, ७ लाख रुपये किंमतीचा ट्रक व ४ लाखांची मोटार जप्त केली. शितल धवीले अधिक तपास करत आहेत. 

Contact For News, Advertising& Promotions:

www.kolhapurnews24hrs.in

kolhapurnews26@gmail.com

ताज्या बातम्या

तोकडे कपडे, मद्यधुंद अवस्थेत, बिभत्स हावभाव; कोल्हापुरातील पार्टीवर पोलिसांचा छापा

कोल्हापुरातील गगनबावडा तालुक्यातील कोदे बुद्रुक पैकी आंबेवाडी येथील बुधवारी (दि. ३०) रात्री नयनील फार्म रिसॉर्टमध्ये नृत्यांगनासोबत काही तरुण बेकायदेशीर पार्टी करत असल्याची माहिती मिळाली.

कोल्हापूर: राज्यात सध्या विधानसभा निवडणुकीची रणधुमाळी सुरू असून आचारसंहिता देखील सुरू आहे. ठिकठिकाणी निवडणूक आयोगाची भरारी पथके तैनात असून प्रत्येक गाडी आणि पार्ट्यांवर पोलिसांची करडी नजर आहे. अशातच बुधवारी रात्री उशिरा गगनबावडा तालुक्यातील कोदे बुद्रुक पैकी आंबेवाडी येथे बेकायदेशीर सुरू असलेल्या पार्टीवर कोल्हापूर पोलिसांनी छापा टाकत ९ नृत्यांगनांसह ३१ जणांना ताब्यात घेतलं. यात मद्य, मोबाईल फोन व इतर साहित्य असा तब्बल ४ लाख ५१ हजार १०० रुपयांचा मुद्देमाल जप्त करण्यात आला आहे.

मिळालेल्या माहितीनुसार, कोल्हापुरातील गगनबावडा तालुक्यातील कोदे बुद्रुक पैकी आंबेवाडी येथील बुधवारी (दि. ३०) रात्री नयनील फार्म रिसॉर्टमध्ये नृत्यांगनासोबत काही तरुण बेकायदेशीर पार्टी करत असल्याची माहिती मिळाली. अधिक तपास करताना उपविभागीय पोलिस अधिकारी शाहूवाडी विभाग व गगनबावडा पोलिसांच्या संयुक्त पथकाने या पार्टीवर रात्री नऊच्या सुमारास छापा टाकला. यावेळी छाप्यात ९ नृत्यांगनांसह एकूण ३१ जण मद्यधुंद अवस्थेत तोकडे कपड्यातील, अश्लील आणि बिभत्स हावभाव करणाऱ्या नृत्यांगणा, विगरपरवाना दारूचे सेवन करणारे आणि मद्याच्या बाटल्या निदर्शनास आले. यानंतर सर्वांना ताब्यात घेत ९ नृत्यांगनांसह एकूण ३१ जणांवर गगनबावडा पोलीस ठाण्यात गुन्हा दाखला करण्यात आलाय. तसेच पार्टीसाठी आणण्यात आलेला मद्य, मोबाईल फोन व इतर साहित्य असा तब्बल ४ लाख ५१ हजार १०० रुपयांचा मुद्देमाल पोलिसांनी जप्त केला.

ही कारवाई पोलिस अधीक्षक महेंद्र पंडित, अप्पर पोलिस अधीक्षक जयश्री जाधव, उपविभागिय पोलिस अधिकारी आप्पासो पवार यांच्या मार्गदर्शनाखाली गगनबावडा पोलिस ठाण्याचे सहायक पोलिस निरीक्षक ज्ञानदेव वाघ, पो. ना. श्रीकांत मामलेकर, पो. हे. कॉ. मानसिग सातपुते, संदीप पाटील, सागर पाटील, पो. कॉ. दिगंबर पाटील, अशोक पाटील, अमोल तेली यांनी ही कारवाई केली आहे.

दरम्यान, निवडणुकीच्या पार्श्वभूमीवर पोलिस हाय अलर्ट मोडवर आले आहेत. पश्चिम महाराष्ट्र तसेच उत्तर महाराष्ट्रात देखील करोडोंची रक्कम जप्त करण्यात आली आहे.

सतेज पाटलांवरील आरोपांच्या चौकशीची मागणी आम्ही केली असती, तर खूप गोष्टी बाहेर आल्या असत्या: राजेश क्षीरसागर

आमदार जयश्री जाधवांच्या पक्षप्रवेशावरून सतेज पाटील यांनी टीकास्त्र सोडल्यानंतर राजेश क्षीरसागर यांनी पत्रकार परिषद घेत पाटील यांच्यावर टीकास्त्र सोडले. 

कोल्हापूर: कार्यकर्ता सोडून वाड्यावर कधी उमेदवारी गेली हे काँग्रेस कार्यकर्त्यांना सुद्धा कळालं नाही. सतेज पाटील यांच्यासारख्या नेत्यांनी आमदार जयश्री जाधव यांच्यावर व्यावसायिक दबाव होता, असा आरोप करणं चुकीचं असल्याचं शिंदे गटाचे नेते माजी आमदार राजेश क्षीरसागर यांनी म्हटलं आहे. आमदार सतेज पाटील यांच्यावर होत असलेल्या आरोपांची चौकशीची जरी आम्ही मागणी केली तर असती तर खूप गोष्टी बाहेर आले असत्या असंही त्यांनी म्हटलं आहे. आम्ही निवडणूक वैयक्तिक पातळीवर नेणार नाही, त्यांनी देखील नेऊ नये, असे त्यांनी सांगितले. आमदार जयश्री जाधवांच्या पक्षप्रवेशावरून सतेज पाटील यांनी टीकास्त्र सोडल्यानंतर राजेश क्षीरसागर यांनी पत्रकार परिषद घेत पाटील यांच्यावर टीकास्त्र सोडले. 

सतेज पाटील यांचे अनेक सेनापती आमच्या संपर्कात

राजेश क्षीरसागर म्हणाले की, मुख्यमंत्री शिंदे यांची उंची मोठी आहे, त्यांच्यावर सतेज पाटील यांनी बोलू नये. मुख्यमंत्री पुन्हा एकदा शिंदे होणार आहेत असेही ते यावेळी म्हणाले. सतेज पाटील यांचे अनेक सेनापती आमच्या संपर्कात असल्याचा दावा सुद्धा राजेश क्षीरसागर यांनी केला. आमदार जयश्री जाधव यांच्या संदर्भात बोलताना क्षीरसागर म्हणाले की काँग्रेसच्या विद्यमान आमदार जयश्री जाधव यांना गेल्या काही दिवसांमध्ये अपमानास्पद वागणूक मिळाली, म्हणूनच त्यांनी शिंदे गटांमध्ये प्रवेश केला. शिंदे यांनी जयश्री जाधव यांची शिवसेना उपनेतेपदी नियुक्ती केल्याचे क्षीरसागर म्हणाले.  महिला सबलीकरण करण्यासाठी जयश्री जाधव यांना रोल माॅडेल करून ते राज्यभर वापरले जावे असा निर्णय झाल्याचेही त्यांनी सांगितले. पुढील काळामध्ये जाधव यांना न्याय दिला जाईल असेही ते म्हणाले.

काँग्रेसच्या पायाखालची वाळू घसरली

आमच्या नाहीतर काँग्रेसच्या पायाखालची वाळू घसरली असून म्हणूनच रात्रीत उमेदवार बदलण्याची वेळ काँग्रेसच्या स्थानिक नेत्यांवर आल्याचा आरोप सुद्धा त्यांनी केला. आमच्यावर बिनबुडाचा आरोप केल्याचेही त्यांनी म्हटले आहे. त्यांनी सांगितले की, स्थानिक नेत्यांनी काल कोल्हापूर च्या रस्त्यांवरून महायुतीवर टीका केली. मला त्यांची कीव येते कारण मंत्री, पालकमंत्री असताना सुद्धा यांना निधी आणता आला नाही. विकास करता आला नाही. 100 कोटींच्या रस्त्यांवर टीका करून संभ्रम पसरवण्याचा त्यांचा प्रयत्न आहे. राजकारणासाठी असा संभ्रम पसरवण्याचा मी निषेध करतो. निवडणूक वेगळ्या दिशेने नेण्याचा प्रयत्न विरोधकांचा आहे. दोनदोन वेळा मंत्री, पालकमंत्री झालेल्या सतेज पाटील यांच्या पोटात आता दुखू लागलं आहे. कारण त्यांना अपेक्षित विकास करता आला नाही. आपल्या संस्था मोठ्या करायच्या एवढंच काम त्यांनी केल्याची टीका त्यांनी केली. 

पक्षप्रवेश करण्यामध्ये आमचा काही रोल नाही

दरम्यान, जाधव यांच्या शिंदे गटात प्रवेश करण्यामध्ये आमचा काही रोल नसल्याचा सुद्धा क्षीरसागर यांनी म्हटलं आहे. त्यांचं काँग्रेस पक्षामध्ये खच्चीकरण केलं जात होतं. पोस्टरवरून सुद्धा त्यांचा फोटो काढून टाकण्यात आला. रात्रीत उमेदवार बदलणे षड्यंत्र आहे असं त्यांना वाटल्याचं क्षीरसागर म्हणाले. उमेदवार निवड प्रक्रियेमध्ये विश्वासत न घेतल्याने त्या दुखावल्या होत्या असेही त्यांनी सांगितले.  जयश्री जाधव यांच्या पक्षप्रवेशाने महायुतीला बळ मिळालं असल्याचे त्यांनी सांगितले.

Contact For News, Advertising& Promotions:

www.kolhapurnews24hrs.in

kolhapurnews26@gmail.com