मतदानादिवशी पगारी सुटीचा आदेश
कोल्हापूर: विधानसभा सार्वत्रिक निवडणूक २०२४ करिता सर्व विधानसभा मतदारसंघातील मतदारांना मतदानाच्या दिवशी मतदान करण्यासाठी सुट्टी देण्याबाबत शासन परिपत्रक काढण्यात आले आहे. या निवडणुकीसाठी २० नोव्हेंबर रोजी मतदान होणार आहे. निवडणुकीमध्ये सर्व मतदारांना त्यांचा मतदानाचा हक्क योग्यरीतीने बजावता यावा यासाठी निवडणूक होणाऱ्या मतदान क्षेत्रातील कोणत्याही व्यवसायात, व्यापारात, औध्योगिक, उपक्रमात किंवा इतर कोणत्याही आस्थापानेमध्ये कार्यरत असलेल्या प्रत्येक व्यक्तीला, मतदानाच्या दिवशी सुट्टी दिली जाईल, असे शासन आदेशामध्ये नमूद करण्यात आले आहे.
मुख्यमंत्रीपदावरून ‘मविआ’ त धुसफूस
मुंबई: मुख्यमंत्रीपदाचा चेहरा निश्चित करण्यावरुन महाविकास आघाडीतील पक्षांमध्ये अजूनही शीतयुद्ध सुरु आहे. दुसरीकडे महाविकास आघाडीची बांधणी करणारे शिवसेना उद्धव बाळासाहेब ठाकरे पक्षाचे खासदार संजय राऊत यांनाही मुख्यमंत्रीपदाची स्वप्ने पडू लागल्यामुळे कॉंग्रेससोबत त्यांच्या पक्षाच्या नेत्यांमध्ये अस्वस्थता पसरल्याची चर्चा सुरु आहे.
मुख्यमंत्रीपदावरून तीन दशके जुनी असलेली भाजप-शिवसेना युती तुटली. भाजपशी फारकत घेऊन कॉंग्रेस व राष्ट्रवादी कॉंग्रेससोबत हातमिळवणी करून आघाडी स्थापनेपासून ते महाविकास आघाडीचे सरकार आणण्यात राऊत यांनी अत्यंत महत्वाची भूमिका निभावली. सत्त्तास्थापनेसाठी केलेली मेहनत बघता, मुख्यमंत्रीपदाची माळ आपल्या गळ्यात पडणार, असा विश्वास राऊत यांना होता; मात्र ऐनवेळी उद्धव ठाकरे यांनी स्वतःच मुख्यमंत्री होण्याची तयारी दाखवल्याने संजय राऊत यांचा हिरमोड झाला.
२०२२ मध्ये एकनाथ शिंदे यांचा बंडामुळे उद्धव ठाकरे यांना मुख्यमंत्रीपदावरून पायउतर व्हावे लागले. त्यानंतर पक्ष गेला, धनुष्यबाण चिन्ह गेले. या कठीण परिस्थितीत शिवसेनेची (ठाकरे) भूमिका मांडण्याची धुरा संजय राऊत यांचा खांद्यावर आली. शिवसेनेचे (ठाकरे) अस्तित्व राखण्यासाठी संजय राऊत यांनी अनेक वेळा पातळी सोडून टीका केली. पुढे पत्राचाळ प्रकरणात त्यांना तुरुंगातही मुक्काम करावा लागला. त्यांचा प्रखर वाणीमुळे पक्षाची वाताहत झाली, अनेक निष्ठावंतांनी दुसऱ्या पक्षाची वाट धरल्याचे अनेक नेते सांगतात. ‘मातोश्री’ सोबतच्या राऊत यांच्या सलगीचा त्रास उद्धव ठाकरे यांच्या पक्षाच्या होऊ लागल्याची दबक्या आवाजात चर्चा आहे. सुभाष देसाईंपासून शिवसेनेच्या निष्ठावंत नेत्यांची एक फळी आहे. पक्षासाठी केवळ संजय राऊत नव्हे, तर अनेकांनी आपले राजकीय आयुष्य दावणीला लावले, त्याचे काय, असाही सवाल पक्षातून आता विचारला जात आहे.
परदेशात मराठी भाषेचा जागर गरजेचा: प्रवीण कांबळे
‘परदेशात मराठीचा प्रसार करताना मराठी साहित्यावर आधारित माहिती सातत्याने उपलब्ध करायलाच हवी. मात्र त्यासोबतच मराठी कलेचा प्रसार होणे आवश्यक आहे. कलेचा जागर तिथे व्हायला हवा, असे मत ‘मराठीचा झेंडा अटकेपार’ या दृक्श्राव्य कार्यक्रमात व्यक्त करण्यात आले. ज्येष्ठ लेखक विश्वास पाटील, आंतरराष्ट्रीय मराठी मंचाचे लंडनमधील समन्वयक प्रवीण कांबळे व अभिजात भाषा पाठपुरावा समितीचे अध्यक्ष तसेच आंतरराष्ट्रीय मराठी मंचाचे मुख्य समन्वयक डॉ. ज्ञानेश्वर मुळे यांत सहभागी झाले होते.महाराष्ट्र सरकार, मराठी भाषा विभाग, राज्य मराठी विकास संस्था आणि समिती क्रियशन्सकडून आंतरराष्ट्रीय मंचाची भूमिका मांडणारा हा कार्यक्रम दर शनिवारी होत आहे.
‘कुठलीही भाषा साहित्यापेक्षा व्यवहारातील बोलण्यात अधिक असते, तेव्हा ती प्रत्यक्ष वापरत येते. दुरचित्रवाहिन्यांची प्रसाराची शक्ती असते, तिचा परदेशात मराठीचा प्रसारासाठी वापर करून घ्यायला हवा. मराठीतील उत्तम मालिका, चित्रपट, नाटके असे संवादात्मक मराठी कार्यक्रम परदेशात पोहोचायला हवेत. तरच खऱ्या अर्थाने ही भाषा परदेशात जाऊन जगभरात जिवंत राहील. युके व महाराष्ट्राचे जवळचे नाते आहे. मोल्सवर्थ नावाच्या अभ्यासकाने घोड्यावर बसून मराठीचा शब्दकोश तयार केला. मराठ्यांचा इतिहास लिहिणारे, येथील देवालायांचा अभ्यास करणारे अनेक ब्रिटीश आहेत. हे आपण जाणून घेत थोडा अधिक अभ्यास करावा लागेल’, असे आवाहन विश्वास पाटील यांनी केले.
प्रवीण कांबळे हे विद्यार्थी दशेत असतानापासून २००९ पासून युकेमध्ये आहेत. ब्रायटनला त्यांनी मराठी विद्यार्थ्यांना एकत्र आणून सन साजरे करणे सुरु केले. ‘मराठीसह सर्वच देशांत भारतीय विद्यार्थ्यांची संख्या मोठ्या प्रमाणात वाढलेली आहे. लंडनच्या वाचनालयात हिंदीसह, इटालियन, अरबी भाषेतील पुस्तके आहेत, आता आम्ही मराठी पुस्तके येथील वाचनालयात ठेवण्यासाठी प्रयत्न करतोय. आता अग्रणी दहा मराठी पुस्तके लंडनच्या वाचनालयात ठेवू’, असे प्रवीण कांबळे यांनी सांगितले.
आमदार आबिटकर तरुणांसाठी प्रेरणास्थान: सतीश शिंदे
आजरा: गेल्या अडीच वर्षांपासून विरोधी पक्षांकडून अनपेक्षित टीका टिप्पणी करण्यात आली पण न डगमगता, कोणत्याही प्रकारचा मनामध्ये राग न बाळगता आपल्या कार्यातून आपण जे निर्णय घेतले ते किती बरोबर आहेत हे सातत्याने दाखवून देऊन, लोकांना वैयक्तिक भेटून साधलेला संवाद, इतर पक्षांकडून केले जाणारे कौतुक यामुळे सामान्य व सुशिक्षित माणसाला पुन्हा एकदा मतदान करण्यासाठी भाग पडण्याचे काम फक्त आणि फक्त माननीय आमदार श्री. प्रकाश आबिटकर यांच्या व्यतिरिक्त दुसर कोणीही करु शकत नाही. असे वक्तव्य मा. सतीश शिंदे यांनी व्यक्त केले.
उमेदवारांनी त्यांच्या कार्याची दिशा बदलने गरजेचे: प्रवीण पाटील
गवसे: उमेदवारांनी त्यांच्या कार्याची दिशा बदलली पाहिजे. फक्त आश्वासने देण्यापेक्षा ती पूर्ण करण्याचा विश्वास स्वतःमध्ये जागृत करावा. नाहीतर फक्त दर पाच वर्षांनी तीच आश्वासने द्यावी लागतील. निवडणुकीमध्ये प्रत्येकावर आरोप प्रत्यारोप करण्यापेक्षा विकासाच्या मुद्द्यांवर गांभीर्याने चर्चा करावी. रामतीर्थ सारख्या धार्मिक स्थळांची सुरक्षितता, सुशासन व कायद्याचे पालन, सर्वांसाठी सर्वांगीण शिक्षण, पार्किंग, आठवडी बाजार नियोजन, वैद्यकीय सेवा अशा मुलभूत प्रश्नांकडे लक्ष द्यावे. यासाठी नवीन योजना आणि त्याच्या अंमलबजावणीवर भर द्यावा. विकासाचा मुद्दाच चर्चिला जावा आणि त्याकडे प्राधान्याने लक्ष द्यावे.
 |
www.kolhapurnews24hrs.in
kolhapurnews26@gmail.com