कोल्हापूर न्यूज

 

कोल्हापुरात आघाडीत उमेदवारीवरून संघर्षाला निमंत्रण

कोल्हापूर जिल्ह्यात महाविकास आघाडीचे उमेदवार जाहीर होताच चार मतदारसंघांत बंडाचे झेंडे लागले आहेत.

कोल्हापूर : कोल्हापूर जिल्ह्यात महाविकास आघाडीचे उमेदवार जाहीर होताच चार मतदारसंघांत बंडाचे झेंडे लागले आहेत. काही ठिकाणी नाराजी उफाळून आली आहे. कोल्हापूर उत्तरमधील उमेदवारीवरून तर जिल्हा काँग्रेस भवनावर दगडफेक करण्याचा प्रकार घडला. सोमवारी कोल्हापुरातील काँग्रेसची उमेदवारी बदलण्याची वेळ येवून ती छत्रपती घराण्यातील मधुरीमाराजे छत्रपती यांना देण्यात आल्याने पेच वाढला आहे. महाविकास आघाडी अंतर्गत बंडखोरांची नाराजी दूर करण्याचे कडवे आव्हान निर्माण झाले आहे.

            कोल्हापूर जिल्ह्यात महाविकास आघाडी अंतर्गत काँग्रेस पक्षाकडे सर्वाधिक पाच जागा गेल्या आहेत. कोल्हापूर उत्तर मतदारसंघात रात्री उशिरा राजेश लाटकर यांची उमेदवारी जाहीर झाली. काँग्रेस नेते राहुल गांधी यांनी सामाजिक अभियांत्रिकीकरण करण्याचा सल्ला राज्यातील काँग्रेस नेत्यांना दिला होता. त्यातूनच इतर मागासवर्गीय असलेले लाटकर यांना उमेदवारी देण्यात आली. राष्ट्र सेवा दलात जडणघडण झालेले लाटकर यांनी राष्ट्रवादीला रामराम करीत लोकसभा निवडणुकीवेळी काँग्रेसचे काम सुरू केले. त्यांना उमेदवारी दिल्यानंतर त्याचे संतप्त पडसाद उमटले. मध्यरात्री जिल्हा काँग्रेस भवनावर दगडफेक झाली. शहर अध्यक्ष सचिन चव्हाण समर्थकांनी हा प्रकार केल्याचे सांगितले जाते. तेथे हॅशटॅग चव्हाण पॅटर्न असे फलक रंगवले गेले. यावर सचिन चव्हाण यांनीही अजूनही वेळ गेलेली नाही. उमेदवारी बदलावी अशी मागणी नगरसेवकांच्या मोठ्या गटाने केली आहे. परिणामी सूत्रे बदलून लाटकर यांच्याऐवजी मधुरीमाराजे छत्रपती यांना उमेदवारी देण्याचा निर्णय रातोरात घेण्यात आला. यावर लाटकर समर्थकांनी नाराजी दर्शवली. कोल्हापूरचा तिढा आणखीनच वाढला आहे. 

            राधानगरी मतदारसंघात अजित पवार राष्ट्रवादी काँग्रेसमध्ये असलेले माजी आमदार के. पी. पाटील यांनी मशाल हाती घेतली आहे. नाराज झालेले त्यांचे मेहुणे ए. वाय. पाटील यांनी उमेदवारी अर्ज भरण्याची तयारी चालू केली आहे. येथे उद्धव ठाकरे, काँग्रेसमध्ये नाराजी दिसत आहे. इचलकरंजी मतदारसंघ काँग्रेसकडून शरदचंद्र पवार राष्ट्रवादी काँग्रेसकडे गेला आहे. येथे काल प्रदेश सचिव मदन कारंडे यांची उमेदवारी जाहीर झाली. स्पर्धेत असलेले गतवेळचे उमेदवार राहुल खंजिरे, शहर अध्यक्ष संजय कांबळे, स्मिता संजय तेलनाडे असे इच्छुक नाराज झाले आहे. तर राष्ट्रवादीचेच माजी आमदार अशोक जांभळे यांचे पुत्र सुहास जांभळे यांनी उमेदवारी अर्ज भरण्याची हालचाल सुरू केली आहे. चंदगडमध्ये शरदचंद्र पवार राष्ट्रवादीने नंदाताई बाभुळकर यांना रिंगणात उतरवले असले तरी आघाडीतील सर्वच इच्छुक नाराज झाले आहेत. एकूणच कोल्हापूर जिल्ह्यात महाविकास आघाडीत गोंधळाची परिस्थिती निर्माण झाली आहे. हा वाद अधिक वाढणार नाही असा विश्वास आघाडीचे नेते व्यक्त करीत आहेत. लोकसभा निवडणुकीपासून महाविकास आघाडीकडे लोकांचा कल असल्याने उमेदवारीची स्पर्धा जोरदार होती. त्यामुळे इच्छुकांच्या समर्थकांकडून काही प्रकार घडले आहेत. सर्वच इच्छुकांची समजूत घातली जात आहे. त्याला निश्चितपणे यश येईल. आणि आम्ही महाविकास आघाडी म्हणून एकसंघपणे निवडणुकीला सामोरे जाऊ, असा विश्वास काँग्रेसचे विधान परिषदेचे गटनेते सतेज पाटील यांनी व्यक्त केला आहे.

लक्ष्मी पूजनाचा मुहूर्त नेमका कधी..?

३१ ऑक्टोबरला की १ नोव्हेंबरला...?

यंदा दिवाळीची तारीख आणि लक्ष्मी पूजनाचा मुहूर्त या बाबत बराच गोंधळ आहे. काहीजण ३१ ऑक्टोबर तर काही जण १ नोव्हेंबरला लक्ष्मीपूजन आहे असे म्हणत आहेत. तर लक्ष्मीपूजनाचा नेमका मुहूर्त कधी आहे हे पाहूयात.

दरवर्षी कार्तिक अमावस्येला दिवाळीचे लक्ष्मी पूजन केले  जाते. हिंदू धर्मातील हा सर्वात मोठा सण मानला जातो. दिवाळी म्हणजे प्रभु रामचंद्र १४ वर्षांच्या वनवासानंतर अयोध्येला परत येतात याचा आनंद साजरा करण्याचा सोहळा म्हणून दिव्यांचा हा सण साजरा केला जातो. अयोध्या नगरी त्यावेळी दिव्यांनी आणि रांगोळ्यांनी सजली होती. त्या दिवसाची आठवण म्हणून दिवाळी हा सण साजरा करण्याची परंपरा चालत आली आहे. यंदा दिवाळीच्या तारखेवरुन संभ्रम निर्माण झाला आहे. कोणी ३१ ऑक्टोबर रोजी तर कोणी १ नोव्हेंबर रोजी लक्ष्मी पूजन असल्याचे म्हणत आहे. चला तर मग आपल्या मनातील संभ्रम दूर करुया व नक्की दिवाळीचे लक्ष्मी पूजन केव्हा करायचे ते पाहूयात..

केव्हा साजरी होणार दिवाळी...?

यंदा दिवाळी ३१ ऑक्टोबर २०२४ रोजी साजरी केली जाणार आहे. जयपूरचे केंद्रीय संस्कृत विद्यापीठातून अखिल भारतीय विद्वत परिषदद्वारा आयोजित धर्मसभेत सर्वसंमतीने हा निर्णय घेण्यात आला आहे. प्रतिष्ठीत विद्वानांच्या आणि ज्योतिषाचार्यांच्या आणि धार्मिक तज्ज्ञांच्या मतांच्या निर्णयाचा मान राखत ही तारीख जाहीर करण्यात आलेली आहे.

कार्तिक अमावस्या आणि लक्ष्मी पूजनसाठी ३१ ऑक्टोबर या दिवसाला योग्य ठरवले आहे. ३१ ऑक्टोबर या दिवशी दिवाळी साजरी करण्यावरुन कोणताही वाद नसल्याचे म्हटले जात आहे. सर्व महत्वाच्या व्यक्तींशी विचारविनिमय केल्यानंतर ३१ ऑक्टोबरची निवड केली आहे.

०१ नोव्हेंबर रोजी प्रदोष काळात केवळ काही मिनिटे अमावस्या तिथी राहणार आहे. त्यामुळे लक्ष्मी पूजनाला पुरेसा वेळ मिळणार नाही, तर ३१ ऑक्टोबर रोजी प्रदोष काल आणि अर्धरात्री दोन्हीबाबतीत अमावस्या असल्याने धर्मशास्रानुसार याच तारखेला (३१ ऑक्टोबर ) दीपावली साजरी करणे योग्य ठरेल असे सभा अध्यक्ष प्रा. रामपाल शर्मा यांनी म्हटले आहे.

३१ ऑक्टोबर रोजी अमावस्येचा प्रवेश प्रदोष काळात होतो. आणि प्रदोष येताच दीपावली रात्र सुरु होते. वृष लग्न येतो. ब्रह्मपुराणानुसार राजा बळीच्या कारागृहातून मुक्त होऊ लक्ष्मी एकदम स्व‍च्छंद होऊन अर्ध्या रात्री प्रत्येकाच्या घरी जाते. अमावस्येच्या अर्ध्या रात्री ज्याचे घर खुले आहे, त्यांच्या घरी लक्ष्मी निवास करते. त्यामुळे सर्व विद्वानांच्या मतानुसार येत्या ३१ ऑक्टोबर रोजी दिवाळी साजरी करणे योग्य होणार आहे असे केंद्रीय संस्कृत विद्यापीठाचे संचालक प्रा. सुदेश शर्मा यांनी म्हटले आहे.

१ नोव्हेंबर रोजी का नको लक्ष्मी पूजन...?

जर प्रदोष काळ 05.41 वाजल्यापासून 08.50 वाजल्यानंतर रात्री 24 मिनिट अमावस्या राहीली असती तर 1 नोव्हेंबर रोजी दीपावली साजरी करता आली असती. 1 नोव्हेंबर रोजी सुर्यास्तानंतर केवळ काही मिनिटे अमावस्येचा काळ असल्याने लक्ष्मी पूजन करणे शक्य नाही. त्यामुळे 31 ऑक्टोबर रोजी दीपावलीचे लक्ष्मी पूजन करणे योग्य असे पंडित कौशल दत्त शर्मा यांनी म्हटले आहे. देवी लक्ष्मीजी केवळ एक दिवसच अर्ध्यारात्री आपल्या कृपेचा वर्षाव करण्यासाठी आकाशभ्रमण करीत असते अशी मान्यता आहे.

दीपावली तिथि आणि मुहूर्त:

यावर्षी दीपावलीचा सण 31 ऑक्टोबर 2024 रोजी साजरा केला जाणार आहे. जयपूरच्या केंद्रीय संस्कृत विद्यापीठातील अखिल हिंदू पंचांग नुसार या वर्षी अमावस्या तिथी 31 ऑक्टोबर दुपारी 3.52 पासून 1 नोव्हेंबर सायंकाळी 6.16 मिनिटांपर्यंतच आहे.त्यामुळे 31 ऑक्टोबर रोजी रात्री दीपावलीचे लक्ष्मी पूजन करणे संयुक्तिक आहे.

दीपावली मध्ये पूजेचा विधी:

दिवाळीला पूर्व दिशा वा ईशान्य दिशेला एक चौकी ठेवावी, त्यावर लाल वा गुलाबी वस्र अंथरावे, आधी गणेशाची मूर्ती ठेवावी, त्यांच्या उजव्या लक्ष्मीजीला ठेवावे, आसनावर बसून चारी बाजूने पाणी शिंपडावे, त्यानंतर संकल्प करुन पूजा सुरु करावी. एक मुखी तुपाचे निरंजन प्रज्वलित करावे. मॉं लक्ष्मी आणि भगवान गणेशला फूले आणि मिठाई अर्पण करावीत. त्यानंतर आधी गणेश आणि नंतर मॉं लक्ष्मीचे स्तूती मंत्रांचा जप करावा, आरती करावी आणि शंखध्वनी करावा, घरात दीप ज्वलन करण्यापूर्वी ताटात पाच दिवे पेटवून फूलांना अर्पण करावे, त्यानंतर घराच्या विविध कोपऱ्यात दीपक ठेवावेत, मंदिरात ही दीपक प्रज्वलित करावेत. दीपावलीचे पूजन पिवळे किंवा चमकदार कपडे परिधान करुन करावे, काळा, तपकिरी किंवा निळा रंग परिधान करु नये.

सुनील सुतार यांना केंद्र प्रमुखपदी बढती

     आजरा: आजरा तालुक्यासह संपूर्ण जिल्ह्यास उपक्रमशील शिक्षक म्हणून परिचित असणारे राष्ट्रीय पुरस्कारप्राप्त शिक्षक सुनील सुतार यांना नुकतीच केंद्र प्रमुखपदी बढती मिळाली. सलग सतरा वर्षे पंधरा दिवसीय योग शिबिरे, सलग तेरा वर्षे मैदानावर नकाशा रेखाटन, रक्तदान शिबिरे, स्पर्धा परीक्षा मार्गदर्शन, विज्ञान मेळावे, मल्लखांब मार्गदर्शन आदि अनेक उपक्रमांची मालिका गत तीन तपांमध्ये राबविण्यामध्ये श्री. सुतार यांचा पुढाकार होता. बढतीमुळे त्यांच्या या अनुभवाचा फायदा आता निश्चितपणे अनेक शिक्षकांना होणार आहे. श्री. सुनील सुतार यांना विद्यामंदिर देवर्डे शाळेत कार्यरत असताना २००८ च्या शिक्षकदिनी जिल्हा आदर्श शिक्षक पुरस्कार  तर याच शाळेत २०१५ च्या शिक्षकदिनी राष्ट्रपतींच्या हस्ते राष्ट्रीय शिक्षक पुरस्कार देऊन गौरविण्यात आले आहे.

उसाला ३७०० रुपये उचल द्यावी; राजू शेट्टी 

जयसिंगपूर येथे आज स्वाभिमानी शेतकरी संघटनेची २३ वी ऊस परिषद झाली. यावेळी संघटनेचे संस्थापक अध्यक्ष राजू शेट्टी यांनी या मागणीचा ठराव केला.

कोल्हापूर : चालू वर्षाच्या ऊस गळीत हंगामासाठी उसाला पहिली उचल म्हणून प्रति टन ३७०० रुपये देण्यात यावी, अशी

मागणी माजी खासदार राजू शेट्टी यांनी शुक्रवारी केली. जयसिंगपूर येथे आज स्वाभिमानी शेतकरी संघटनेची २३ वी ऊस परिषद झाली. यावेळी संघटनेचे संस्थापक अध्यक्ष राजू शेट्टी बोलत होते. यावेळी या मागणीचा ठराव करण्यात आला.

        या परिषदेमध्ये काही महत्त्वाचे ठराव करण्यात आले. ते याप्रमाणे – गतवर्षी गाळपास केलेल्या उसाला दिवाळीपूर्वी प्रति टन २०० रुपयांचा हप्ता देण्यात यावा. पुरात नुकसान झालेल्या ऊस व अन्य पिकांचे पंचनामे करून शेतकऱ्यांना नुकसान भरपाई देण्यात यावी. ऊस वजन काट्यात घोटाळे होत असल्याने ऑनलाईन सॉफ्टवेअर काटे बसवावेत. वाहतूक करणाऱ्या मुकादमांनी फसवणूक केली असून, अशांवर गुन्हे दाखल करण्यात यावेत. ऊस वाहतूक खर्चात भिन्नता आढळत असल्याने त्यामध्ये सुसूत्रता आणावी. नाबार्डने साखर कारखाना साखर कारन कर्ज तीन टक्के व्याजदराने द्यावे. सर्वच कृषी पंपांना बीज माफ करण्यात यावी.

Contact For News, Advertising& Promotions:

www.kolhapurnews24hrs.in

kolhapurnews26@gmail.com